Limericks för Oktober

van Ludgerd Lüske

Wildschwienjagd

Uppe Jagd in Mäöhlstedt wull man Wildschwiene scheiten,
dorbi köömen dei Jägers mit dei Tied woll an't Schweiten.
So'n Deiert sehg man nargens in Feld un Flur,
so schööt Joop dei Bentheim-Mutten van den Buur.
Dei Krampen in dei Schnuuten wull nümms begeiten.

Mutten = Sau

Bentheimer Landschwein

De Bentheimers hebbt vele Pünkt.
De sünd van Natur, sünd nich sminkt.
Welk denkt nu bestimmt,
dat dat Teelschieven sünd.
De Swien seggt: "So'n Denke, de stinkt!"

Kometenkiekers

In Molbern wullen Berd un Joop den Komet mit Sterd nau studeiern,
dat neie Fernglas dön sei utpacken un forts utprobeiern.
Bernd ögde äöwer dei Kimm nao baoben an'n Häwen,
man den Komet kunn hei dör'n Kieker nich beläwen.
In dei Aobendkölde kann dat mit beschlaon Gläöser woll passeiern.

Arntedank un Bauamt

Use südollenborger Landjugend will Arntedank fiern,
man finnt up einen Hoff uck eine passgroote Schürn.
Brandschutz un eine Nootdörn sünd nich dor,
verklort hiertau nau dat Bauamtbeamtenpoor.
Aower bi minner at 200 Lüe draff dat so passeiern.