Oostfreesland-Klenner 2022
Märzmaand: De Möhl Bohlen in Warsingfehn

Biller un Text vun Thomas Seemann, Verse vun Marlou Lessing

Düt Bild beschrifft, liek as de Schippswarft, mien persönliche Heimat. As Kinner weern wi heel faken to'n Angeln in den Kanaal, de direkt vör de Möhl löppt.

Kannst best erkennen, dat dat Bild fröh maalt is — de witten Torfsäck sünd denn tomehrst op Europaletten vör de Möhl stapelt.

De Möhl woor in't Johr 1806 buut. De Buwies is en Galerieholländer; "Galerie" nöömt een den Ümgang op halve Hööcht. Siet 1886 is de Möhl in Besitt vun de Familie Bohlen, un se is noch intakt un warrt regelmäßig bruukt, dat Mehl un anner Produkte warrt in den Naturkostladen achter de Möhl verköfft. Kannst op de Homepage vun de Möhl nalesen.

In de 1980er Johrn sünd wi heel faken op't Rad ut Neukamperfehn los – för Kinner al en gode Streck. Op den Weg legen in Jheringsfehn Geschäften för Iesenwaren, 'neem een ok Angeltobehör kreeg. Harrst vun Oma 50 Penn kregen, kunnst al en Barg dorför köpen. Ganz anners as hüüt. Allens geev dat noch enkelt: Haken, Blei, Pose, Angelband. Sowat kannst hüüt nich mehr andrepen. Is dat hüüt Verwöhntheit, orr weer dat fröher nich veel komfortabler?

Na, för dat beten Geld kregen wi allens, wat wi bruken dään. Hüüt muttst dat 10er Pack Haken köpen, Posen kost vundaag ok locker mal mehr as 5 Euro per Stück, de een ok mit Knicklichter utstatten kann. — In Warsingsfehn geev dat noch en Angelgeschäft, veel beter as dat eerst, dat weer dat Highlight, avers dor müsst ok mehr Geld in de Tasch hebben.

So Angeln, mit wenig Geld, dat maakt enorm kreativ. Du büst de Natuur utsett un muttst klaarkamen. Dormalen wussen wi ok noch, woans een Haken un Knütten sülven bindt. Een Dag seten mien Fründ un ik mit Angel un Swimmbroot an't Över un höpen, en Fisch wöör dorvun Notiz nehmen. Swimmbroot, dat is loses Broot an'n Haken, dat op't Water drifft. Allens schien uns wied un enorm groot, duppelt dör de Spegeln in't Water; as Kind hest ja ganz annere Dimensionen. De Karpen, de keem, weer reesenhaftig — un he swümm komodig an uns Angeln vörbi. Dat weer en Glück — harr he beten, harr he uns Angeln glatt tweibraken. Liekers kemen wi wedder un wedder dorhin, ok jüst üm düssen gigantischen Karpen. — As Kind versteihst de Tosamenhäng noch nich so: Dor vör de Möhl is dat Water heel sied mit en lütt Wehr, 'neem veel Suerstoff in't Water kümmt — ideaal för de Karpen, dor ehrn Laich aftoleggen, wieldat dat siede Water al veel wärmer is. Vör poor Johr hett mi de Söhn vun'n Möller seggt, dat de Karpen siet 30 Johr jümmers wedder an düsse Steed treckt. Mien Beobachten weer liek.

Uns geiht dat vundag heel good, dat geev al veel slechtere Tieden. Man de Lüüd sünd ok hüüt noch an't Jammern, nienich tofreden. Dorbi kannst mit lütte Saken, mit wenig ok al glücklich ween. De Krieg lehrt dat hüüt ok uns wedder, nich bloots de Minschen, de he direkt drepen deit.

Dat weer dat ganz grote Glück för mi dormalen, un de Erinnern doran sitt heel deep. Dat kannst för Geld nich köpen.


de möhl

de möhl kiekt hooch, de möhl kiekt waak:
wat bringt de wind, wat bringt de dag?
de wulken törmt sik, swatt as nacht —
de möhl höllt wacht.

de möhl steiht steil, de möhl steiht stolt:
200 johr in wind un holt
un allens hett se wedderstahn
— warrt wiedergahn.

de wind weiht ruug, de wind weiht koolt:
de welt verwirrt sik dusendfoolt...
de möhl kiekt frieweg gegenan
un warrt bestahn.


1.3.2022


trüch


na baven


na't Flack

na de Startsiet