Ferientied! Dusende Städters söökt den wieden Horizont un dat Geföhl vun Frieheit hier bi uns an de Noordsee.

Op de Inseln Norderney un Juist fohrt vun Norddeich ut de Fähren vun de "Frisia"-Reederie. Norderney is al siet ca. 1800 en Seebad, dormalen weer dat heel mondän un bloots wat för riekere Lüüd. 1871, in de Kaiser-Willem-Tied, hett ok dat Ünnernehmen "Frisia" anfungen, Touristen na de Inseln to fohrn, toeerst mit lütte Dampscheep, dat weer dat Niegste dormals. Siet de Tied is de Tourismus explodeert, un de Fähren sünd jümmer grötter un fixer worrn. Hüüt kaamt ok Autos an Bord.

---

en korte, atenlose tied
söökt wi feern vun tohuus na roh
un fohrt na noord un gaht an bord
wied op de inseln to.

wenn wi dor anlandt, is't to laat.
wat frie un wied weer, is al weg.
wi gaht an land, wi gaht an'n strand —
de frieheit bleev an deck.

wi seht de fähr, se glitt al foort.
in't blage water spegelt sik
noch een momang ehr witt gestalt
as en vergeten glück.

4.7.2022