De Lüchttoorm Rode Sand bewacht siet 1885 de Wesermündung vör Wangerooge. He is een vun de eersten Buwarken, de ehr Fundament nich op Fastland sett woor, sünnen in'n Meeresbodden — so as dat bi de Offshore-Windrööd vun hüüt begäng is. De Technik , de een dorto bruukt, woor bi den Roden Sand proovt un entwickelt. Hüüt is dat Lüchtfüür nich mehr in Bedreev, de Toorn is Denkmal un Touristenattrakschoon.

rode sand, to niejohr

de tied treckt allerwegen
in unvertruut kuntrei,
in frömd unkenntlich gegend;
nix ritt den nevel twei

uns ritt de tied ahn achten
in't drievens fleten mit.
ehr fleten is uns' jachten,
doch hollt wi nienich schritt,
bet se to all uns bangen
in'n oozeaan uns gütt.

un reglos steiht dorblangen
de toorn in rood un witt.

2.1.2022