Johann Meyer to'n Andenken

vun Freddy Schnoor

An'n 15. Oktober 1904, hüüt vör 121 Johren, bleev de nedderdüütsche Schriftsteller Johann Meyer in Kiel dood. To sien Tied hooch anerkannt, is he hüüt leider teemlich in Vergetenheit fullen.

An'n 5. Januar 1829 as Buernkind in Wilster boren, hett he sik toierst as Handwarker dörslaan, denn op Liehrer studeert — sotoseggen op'n tweeten Bildungsweg —, hett sik as Liehrersmann, Pressemann un Dichtersmann en Naam maakt un sogor en psychiatrisch Anstalt grünnt. Beten wat mehr kannst hier nalesen. Hoochdüütsche Gedichten vun em kannst hier einige nalesen, de sünd ok schöön. En Warköversicht över sien plattdüütsch Warken finnst bi Plattmakers, un de gröttste Deel dorvun is bi Projekt Gutenberg digitaliseert, t.B. sien gesamte plattdüütsche Lyrik op hunnerte Sieden.

Wat schöön, dat een hüüt ok de Warken vun nicht mehr so bekannte Dichters in't Internet finnen kann!

Kennst du dat Land?
Gedicht von Johann Meyer

Kennst du dat Land
An'n Holstenstrand,
Vun'n Elvstrom bit de Eiderkant?
Wo wit de See, bald lud, bald sacht,
Sick vor di dehnt in all ehr Pracht?
Wo ruscht dat Reth und singt de Swan,
Wo Segel swevt op blaue Bahn?
Dat smucke Land
An'n Holstenstrand,
Dat is min Heimatland!

Kennst du dat Land
An'n Holstenstrand,
So lütt — un doch so weltbekannt?
Versteken achter Dik un Damm?
Mit Hemmingstedt un mit de Hamm?
Wo Hunnert gegen Dusend sla'n?
Wo Graf un Fürsten ünnergahn?
Dat lüttje Land
An'n Holstenstrand,
Dat is min Heimatland!

Kennst du dat Land
An'n Holstenstrand,
Vun Segen rik ut Gottes Hand?
Wo lustig twischen Heck un Dorn
De Wischen gröönt un bruust dat Korn?
Wo Lurken singt? Wo blöht dat Saat?
Un wo in'n Wold de Eeken staht?
Dat schöne Land
An'n Holstenstrand,
Dat is min Heimatland!

Kennst du dat Land
An'n Holstenstrand?
Ick füll min Glas bit hoch an'n Rand!
Und för min best un leevstes Gut
Drink ick den letzten Drüppen ut!
Gott's Segen denn veel dusendmal
Daröwer hin! — darop hindahl! —
Hurah! min Land
An'n Holstenstrand!
Hurah! min Heimatland!