Yad Vashem — Gedenkstee för de Jöden
Auschwitz
Majdanek
Theresienstadt
Steden van
Schüld un Schann
Hete Füür brannt
Hele Tied
Yad Vashem — Gedenkstee för de Kinner
Dusende van lüttje Steerns
Seelen van de Kinner
Tinkeln an dat Firmament
Elke Steern en Kind
Danzen tüsken Eer un Heven
Willen leven
Willen leven
Willen Leevde geven
Dusende van lüttje Steerns
Seelen van de Kinner
Tinkeln an dat Firmament
Elke Steern en Kind
Ruseln tüsken elke Woord
Sünd vermoordt
Sünd vermoordt
Elke Woord versoort
Dusende van lüttje Steerns
Seelen van de Kinner
Tinkeln an dat Firmament
Elke Steern en Kind
Wiesen tüsken Last un Lüst
Sünner Rüst
Sünner Rüst
Wat de Welt verlüst
Exodus
Minsken targen
Quälen drieven
Nahber nüms mehr
Nahber is
Ut de Stadt
Un ut dat Loog
Kind un Kegel
Düren neet blieven
Nargens gifft dat
En Tohuus
Well deit hör
En Unnerdack
Waar is dat
Geloovde Land
Na en lange
Exodus
Segg Schalom
Schalom
Dat heet Free
Man sülvst
An de Stee
Waar heelkeen
Leven is
An dat
Dode Meer
Doon sük
Minsken sehr
Daarna
Jahren daarna
Wat domaals
Geböhrde
Sitt as Spell
In dat Fleesk
Deit sehr
Stött an
Pien um Pien
Düürt na
Dreiht dat Woord
in d' Mund um
Gedachten versuren
Lett neet löss
Maakt schüllig
En Steen steiht
Un klaagt
