Dat Bawhuus, Deel 18:
Dat Staohlhuus in dei Siedlung Törten

Van Ludgerd Lüske

Bi usen flotten Gang dör dei Siedlung Törten in Dessau kreeg us dei Rägen doch sinnig tau faoten. Don stünd jüst pass dat lüütke Huus ut Staohl vor us, nix as rin un dröge blieben.
Dat Staohlhuus, et steiht nau gägen dat Huus Fieger, wörd mit den eiersten Deil van dei Siedlung Törten 1927 fardig. Meest sä man in dei Reklaome, dat man nich seihn kunnde, dat dat Huus ut Staohl bawet was. Dorbi harrn Muche un Paulick aover jüst in'n Sinn, dat man dit Materiaol gaut kennen kunn: Ein Äövereinstimmen van Bawen up Industreioart und passen Formenspraoke schull wän.

Dit Bauwark is ein Staohltaofelbau, et besteiht ut ein drägen Staohlskelett, worup 3 mm dicke isoleerte Staohltaofels as Butenwandplaotens monteert sünd. Dat Huus hett kienen Keller. Dei Butenansicht giff sik ut twei tausaomeschaoben Kuben. So kaomet binnen twei Ruumhöchten taustanne. Dei Ruumbäöhns van dei Staobend un van dei eine Schlaopkaomer sünd höger trocken. Hier giff dat bi dei Fensters aover kiene Äöverlichter. Dei Döörns sünd in den leegen End ruumhoch jüst as dei Fensters. Mit 90 m² bütt dit Huus mehr Platz tau'n Waohnen as dei Siedlungshüüs van Gropius.

Blots'n poar Joahr läöter markte man dei Naodeile van disse Konstruktschion. In'n Sommer wörn dei Rümme tau heit un in'n Winter tau kold. Nattigkeit trück nao binnen un greep den Staohl an. Dorümme sette man binnsiet achter dei Staohtaofels eine Tegelmürn un achter dei Iesenfensters Holtfensters in dei passen Grötte.

Eiers bi't Restaureiern 1976 — Paulick geev don noch sienen Raot dortau — un 1993 kreeg dat Huus seinen olden Taustand meist wedder.

Wenn Muche uk för siene Metalltypenhüüser Farven vörseihn harr, so is dat Staohlhuus in Dessau bots gries, witt un schwart sträken. Taueiers schulln dei Hüüser uk tau'n Anbawen wän. Aover dat Forschungsgeld fählde un so bleev et bi ein nich-variaoblet Bauwark.
Gropius hüllt nich alltauväl van dei Metallbauwarke, hei nöhm leiver Staohlbeton, aover hei geev siene Stöhne, dat dit Metallhuus fardig wörd. Wiedergaohn Pläöne, dei Siedlung Törten mit Staohlhüüser tau vergröttern, sünd liggen bläben, wiel dei nao Gropius kaomen Bawhuusdirekter Hannes Meyer entlaoten wörd.

So, nu is use Utflug nao dei Bawhuus-Stadt Dessau up'n End. Wi wätet, dat wi noch lang nich alls van dat Bawhuuswark seihn hebbt, aover Dessau steiht ümmer praot tau'n Beseuken un Bekieken.