Dat Bawhuus, Deel 15:
Dat Arbeitsamt van Walter Gropius

Van Ludgerd Lüske

As wi binnen in Dessau unnerwägens wörn, was dei Weg nich wiet nao ein allbekanntet Huus ut dei Bawhuustied. In' Urlaub söch man wiss kiene Arbeit, aover schwupps stünnen wir vör dat olde Arbeitsamt van Dessau. Dor kunn man woahrhaftig mit dei Kamerao rundloopen un knipsen. De Sünne harr us woll verlaoten, aover dorför geef et uk kienen Arger mit tauväl Schadden unner dei ümmetaustaohn Bööme.

Nao't Inföhren van dei Arbeistlosenpflichtversekerung un dat Tausaomegaohn mit dei Anstalt tau'n Arbeitsvermiddeln 1927 schreev dei Stadt Dessau einen beknappten Weddbewarv ut. Inlaoden wörn Walter Gropius, Hugo Häring un Bruno Taut. Den Updrag kreeg Gropius in' Anfang van 1928, in' Mai 1929 was dei Bau fardig.

Berufsberao'en, Arbeit vermiddeln, Boarutbetaohlen van dei Stön an dei Arbeitslosen mit staodig, in dei Saison up un afgaohn Beseukertaohl, all dat wörd hier erledigt. Gropius sien Arbeitsamt wiest sik ut dör dat Sträben nao Ratschionaoliseerung, so as'm dat uk in dei Privaotwirtschup möök. Hei plaonde twei unnerscheidlike up dei Funktschion anleggte Deile. Den langutloopen Trakt mit twei Etaogen kreeg dei Verwaltung, un dei vörbawte Rundbau mit eine Etaoge was för dei Beseukers. Mit eine van oldsher brukte, kluushaftige Bürostruktuur kunn man dat groote Upkaomen van Beseukers nich bewarken. Dorümme möß man den Bauplaon so anleggen, dat'm dat Publikum bäter stüürn kunn un so dat Arbeitseuken problemlos rundloopen kunn.

Updeilt nao Fraulüe un Kerls un Beruf geev et för dei arbeitseuken Lüe fief Ingänge. Dorachter leegen up glieke Oart anleggte Sektoren. Wenn uk dei Rundbau nao buten hen kiene Fensters harr, so ku'm sik binnen äöver dat helle Lecht van baoben wunnern. Dat leeg an dat b'sünnere Sheddack, et lööt dat Lecht van baoben infallen. Dei bäöverste End van dei Binnenmürns was ut Glas, so kunn dat Lecht dwarschk dör't Huus straohlen.

Bi dat Utstafferern van binnen harrn dei Bawhuuswarkstäen ehren Andeil, dat Leit direkt up'n Bau leeg bi den Bawhuusmann Max Krajewski un den Architektuurstudent ut Dresden Richard Paulick. Dei mit geele Tegelsteine verkleedte Stahlskelettbau is wägen sienen recht b'sünnern Grundplaon ein bestet Bispill för funktschionelle Architektuur. Nao dat Saneern in dei Joahre 2002 un 2003 sitt in dissen Bau dat Amt för Ordnung un Verkehr van dei Stadt Dessau.

Dat Knipsen hett sik hier uk lohnt, eine Bawhuus-Dörnklinken, Binnen- un Butenansichten.

Nu kunn us nix mehr hollen, et güng ut dei Stadt rut nao dei Törtensiedlung, eine groote Anlaoge ut dei Bawhuustied.