Dat
Bawhuus, Deel 7:
Lázló Moholy-Nagy Maoler un
Fotograof
Van Ludgerd Lüske
Disse Biller sünd nich originaol,
sünnern ein digitaolet Anlähnen van Ludgerd Lüske. Sei
käönt dei mit'n Anklick vergröttern. Trügge geiht
dat denn mit den Zurück-Knoop (Trügg-Knoop) in den Browser
(Bruuser).
|
László
Moholy-Nagy wörd 1895 in Ungarn born un störv 1946 in Chicago.
Is et recht, in dei Tieden mit ein soziaolet Ümmweltern Maoler
tau wern? Kann ik för mi sülvs dat Privileg van dei Kunst
bruken, wenn alle Minschken nödig wörn tau dat reine Äöverläben?
Kunst un Würklichkeit harrn in dei leßten hunnert Joahre
nix miteinanner tau daun. Sik persönlik taufräestellen bi't
Kunst maoken hett för dei Massen nix bröcht. Ik hebb mit väle
Fraulüe un Kerlse schnacket. Ik hebb seihn, wat näben Äten
un Drinken noch bruket werd. Ik hebb begriepen lehrt, wat biologischket
Glück woahrhaft bedü'en deit. Ik weit nu: Wenn ik mien bestet
Käönen up dei passen Oart warken laote, denn is dat recht,
dat ik Maoler wern dau.
As Maoler kann ik dei Läbenssubstanz vermiddeln. Dat wör
dat Sinnen van dissen Kunstmann.
Dei befaote sik siet 1918 mit dei Maolerei. 1919 trück hei nao
Wien un 1920 kööm hei nao Berlin. 1922 was dei eierste Einkelutstellung
in dei Galerie "Dei Storm" in Berlin. 1921 harr hei Lucia
Moholy (geb. Schulz) freiet.
1923
äövernöhm hei den Posten van Johannes Itten un was Formmeester
van dei Metallwarkstäe un Baos van den Vörkurs an dat Bawhuus
in Weimar. Hei ünnerrichtede eiers dor un läöter in Dessau,
bit 1928. Moholy-Nagy hörde tau dei best beneumten Lehrmeesters
an't Bawhuus.
Dortau warkede hei an typograofischke Formen un as Fotograof. Af 1924
bring hei tausaome mit Walter Gropius dei Bawhuusbäuker rut. Dör
sien dynaomischket Vermiddeln van sien Lehrwark, wat b'sünners
dat Visuelle un dat Materiaolhafte bi dat Gestalten unnerstrik, driff
Moholy-Nagy an't Bawhuus dei moderne industriestüern Formenspraoke
vöran.
Bit
1923 spälde dei Fotograofie kiene groote Rulle un stünd bit
dorhen nich in't Lehrprogramm. Lazlo Moholy-Nagy settde dit neie Middel
in dei Kunst in un leggde den Grund för ein breiet Spektrum an
Fotokünste. Erich Consemüller, Andreas Feininger un T. Lux
Feininger, Lucia Moholy of Walter Peterhans wörden so tau beneumte
Fotograofen. Aover uk dei välen Studenten an't Bawhuus bröchde
hei tau bedüden Experimente un Amateurupnaohmen. För Moholy-Nagy
was dei Fotograofie, herkaomen van dei russischken Avantgarde, dat ideaole
Warkmiddel för ein Neiet Seihn. Hei fünd in dit kloare
Gestalten van Lecht neie Formen tau'n Woahrnähmen un Utleggen van
eine dör dei Technik radikaol verännerte Welt.
Dör dei Afstrakten Lechtbiller, siene Fotogramme, dör neioartige
Upnaohme-Perspektiven un Bildutschnitte, dör Techniken van Montaoge,
Collaoge of Äövernännerbelichten wörd Moholy-Nagy
ein Pionier för experimentelle Fotograofie.
Hei
sehg, as ein' van dei eiersten, in dei Fotograofie ein bedüden
Warkmiddel för anwennde Graofik un Reklaome. In siene eigen Publikatschionen
un uk in dei van Herbert Bayer kreeg dat Typfoto, dei Kombinatschion
van Bild und Schrift, eine neie groote Rulle.
1928 trück Moholy-Nagy mit siene Frau nao Berlin, wo hei as Bühnenbildner
un Utstellungsgestalter un bi 'ne Riege Experimentaolfilme warkede.
1934 siedelde hei ümme nao Amsterdam un 'n Joahr läöter
nao London.
Af 1937 harr hei in Chicago dat Leit äöver dat New Bawhuus.
Dor wull hei mit dat anfungen Bawhuuskonzept wiedermaoken.
Dat hüült sik nich lange un hei grünnde 1939 dei School
of Design, dei af 1944 Institute of Design heet.
Links tau Moholy-Nagy:
Links tau'n Lecht-Ruum-Modulaoter:
Google-Seuken:
|