Dat Bawhuus, Deel 3:
Oskar Schlemmer

Van Ludgerd Lüske

Dat Maolen van Wandbiller bröchde Oskar Schlemmer in't Bawhuus. As Walter Gropius dit Warken sehg, nöhm hei Schlemmer mit nao Dessau.

Oskar Schlemmer wörd an' 04. September1888 in Stuttgart born. Dei Schaultied belävede hei in Göttingen. As hei 15 was, störven siene Öllern, don kreeg hei eine Lehrstäe in dei Künstanstalt för Intarsien in Stuttgart.
Af 1905 was hei dor up dei Schaule för Künstgewarf. Mit ein Stipendium kunn hei aover äöverwesseln an dei Stuttgarter Akademie för Billende Künst, wor hei Meesterschäuler mit ein eigen Atelier bi Adolf Hoelzel wörd. Adolf Hölzel sien Leitwoort was: "Ut dei Middel kaomt dei Künst."

1914 kreeg Hoelzel siene Schäulers, Schlemmer, Baumeister un Stenner in dei Vörhalle in dat Haupthuus van dei Kölner Warkbund-Utstellung an't Wark. Sei schullen dor drei Wandbiller maolen.
Hier kreeg dei Architekt Walter Gropius den Maoler Oskar Schlemmer in'ne Künne un rööp üm 1920 mit Paul Klee als Kunstlehrer an dat Bawhuus.

In' Harvst 1925 wesselde Schlemmer nao den nei upbawden Bawhuus-Trakt in Dessau. Dor möök hei eine Provebühne aopen. Dei veier Afdeile, Foyer, Aula, Bühne un Kantine wörden van dei Kunstlüe an't Bawhuus sülvs utstaffeiert. Nich blots Oskar Schlemmer möök Theaoterexperimente, uk annere tau dei Tied beneumte Lüe harrn dor ehr Upträen. Schlemmer verlööt all 1929 dat Bawhuus un güng an dei Kunstakademie in Breslau. Dei wörd aover 1932 wägen eine Notverordnung van dei Regeerung in Preußen schlaoten. Schlemmer nöhm don eine Stäe an dei Tausaomeschlaoten Staotsschaulen för Künst in Berlin an. 1933 kööm hei unner Druck van dei Natschionaolszialisten un wörd entlaoten. Siene Biller güllen as "utoardt", unnerdeß wörd sien Wark in dei USA in groote Utstellungen bewunnert.

Oskar Schlemmer verlöös sien Vermögen un störv an' 13. April 1943 in Baden-Baden.

Oskar Schlemmer bröchde tüschken 1916 un 1922 as modernet Danztheaother dat Triadschke Ballet rut.
Ein Kostümtheaoter aohne Vertellen lööp af, blots geometischk anleggte Kostümliever mit ehre Eigenoart wiesden einen besünnern Danz. Schlemmer möök van dei Minschkenfiguur einen mathematischk-geometrischken Formentyp. Dissen Formentyp ka'm uk faoken in sien Billerwark seihn.

Hier staoht 'n poar Links, wor tüschken annere Bawhuusbiller uk Schlemmer-Biller un Schlemmer-Videos mit dat Triadschke Ballett wieset werd.
Posterbiller

mechaonschket Ballett mit Videobiller (Neederländisk)

• Video 1
• Video 2
• Video 3

Dat Book dorto:
Bauhaus-Ideen um Itten, Feininger, Klee, Kandinsky.
Vom Expressiven zum Konstruktiven.
Mit Beiträgen von Magdalena Droste und Ute Ackermann
Hrsg.: Schloßmuseum des Marktes Murnau, bearbeitet von Brigitte Salmen
142 Seiten, 39 S/W und 134 Farb.-Abb.
Preis: € 19,80 zzgl. Versandkosten € 3.-
ISBN-10: 3-932276-24-8
ISBN-13: 978-3-932276-24-8