Maitied, Deel 3: Väögels un Wind

Texte för Kinner van Hildegard Tölke
— Dat Platt is dei Tungslag van't Oldenburger Münsterland. —

Moin! Moin roop ick di tau!
Dei Dag is de weer.
Bi Schwölken un Lünkes
do gaiht dat hoch her.

Un wi sei rittket un flittket!
Dat gaiht as ein Dittket!
Sei riet ehrn Schnaobel wiet aopen
un du bis noch an't Schlaopen.

Hör, dei Draußel in'n Appelboom!
Dei flait di wat vör.
Kumm rut ut dien'n Droom,
maok aopen dei Dörn.

Lüttke Katt'n sit aal an'n Weg,
putzt sick fein dei Schnuut.
Buten is dat so lech —
Du Schlaopmüss'n, staoh up!

rittket = zittern vor Aufregung
Dittket = so schnell wie eine elektrische Nähmaschine

Rög un bewäg di!
Mit Singen geiht dat masse bäter!
(Melodie: Es war eine Mutter...)

Mit Links an dien Näsen,
mit rechts an dien Ohr,
nu kummst di sülwes
as' n Aope bold vör!

Nu hoch mit dien Kneie,
un daol mit dien Kopp
dei Arme nao baoben,
un nu in Galopp.

Nu trampelt mit Fäute!
Dat wedd aower luut,
klatsch aal in jau Hann'n
un holt uck jau Schnuut.

April! April!

Morgens Sünn'n
Middaogs Schnei
Un dann wedder
Storm, o wei
Einmaol Rägen,
up'nmaol is't heit
so ein Weer
kien Menske weit
wat disse Tüterkraom schall
is dei Welt dann mit'nmaol mall
Gott sei Dank
Weit jedet Kind
Nu is April
Un dei — dei spinnt!

Tüterkraom = Unfug
mit'nmaol = plötzlich

Van Walter Mahringer, in Südoldenborger Platt
äöversett van Hildegard Tölke

Treck diene Stäweln an, sett up dien 'n Haut,
/: kumm fix herut, kumm fix herut, wannern dait gaut! :/

Hörs, wo dei Väögels singt? Singt ja so seut.
/: Sing du man uck, sing du man uck, sing du un flait! :/

Kiek, wat dei Blaumen blaiht, blau gäl un rot.
/: Frai di doran, frai di doran, fraien dait gaut! :/

Bis du dann gaut taufrä, lacht di dei Sünn,
/: schnack du man Platt, schnack du man Platt mit diene Frünn'! :/

Maitied
Van Hildegard Tölke

Dat was so'n richtigen Maidag.
Dei Sünne scheen.
Dei Kinner spälden achtern Huuse.
In'n Gorn wassen dei Lüe taugange.
Dei Flieder blaihde un man rök üm.
Draußeln un Meeskes harn dat drocke mit ehr Est.
Uppe Wisken kunns den Kiewitt hörn.
Achter'n Plaug söchden twei Quäksterde nao Käfers.
Un baoben dräöwer har ein Haobicht all den Häkster in't Ooge.
Dei Sünnväögels flittketen üm den Kessbernboom.
Ut'nHolte röp dat Kuckucksmännken.
Kaihe un Peer löpen uppe Wisken.
Un an'n Wäge blaihn all dei gälen Botterblaumen.
Dei Kuckuck har roopen.
Nu dröffden dei Kinner uck Kneistrümpe antrecken.

Tau disse Tied har ein Rotkehlhenpaor ünnern Dack an'n Huuse ein Est baut.
Willi har dat seihn.
Dag för Dag keek hei dor van wieten hen.
Dei Väögels söchden lüttke Stöcker, Moos un Fern.
Daogelang wassen sei fliedig.

Do wör dat up'nmaol daon.

Twei Wäken läöter sehg Willi sei nu mit Würmer, Käfer, Ruupen un Fleigen nao'n Est fleigen.
"Dor sünd Junge in 'n Est", rööp Willi vuller Fraide.
Eines Daogs keck sogor ein Väögelken ut'n Est.
Dat reet sien Schnaobel wiet aopen.
Hei wull aaltied Fauer häbben un kunn sien Hals nich vull naug kriegen.

Eine Wäken läöter was dat Malör dor.
Ein lüttket Vaogelkind leeg naokt un dode uppe Ern.
"Dat Vaoelkind is ut 'n Est falln. Dat Vaogelkind is dode", röp Willi un löp luut schrai'nd int Huus.
Mama stürde üm un sä: "Villicht hätt dat Naobers Katten daon."
Aower an ännern Dag leeg dor all wedder ein doen Vaogel. So güng dat drei Daoge lang.

Willi hüllt dat nich länger ut. Dat wull hei wäten.
Wassen dor noch Väögels inne? Hei kladderde uppe Leddern, steek siene Näsen dichte in't Est.
Do verschrück hei sick aower.
Ein upplusterden Vaogel seet dor, reet sien Schnaobel wiet aopen. Sien Rügge, sien Hals un dei Fläögels wassen blaugries;
dei Bost un dei Buuk grieswitt ringelt;
dei langen Sterdfern schwatt mit witte Placken.

Giffdat so'n Vaogel bi us?

Willi frögg di nu:

Wat is dat för'n Vaogel?
Häss du üm dit Johr all roopen hört?
Disse Vaogel weit sien Naom!
Wecker häf woll dei lüttken Väögels ut 'n Est schmäten?
Kenns du Lieder van dissen Vaogel?

Lernwör:
Meeskes = Meisen
Draußeln = Amseln
Plaug = Pflug
Quäksterd = Bachstelze
Haobicht = Habicht
Häkster = Elster
Sünnenvaogel = Schmetterling
Est = Nest
Leddern = Leiter
Bost = Brust
Sterdfern = Schwanzfeder