Stierndålers

Märken vun dei Bräuders Grimm,
in Riemels nadicht vun Behrend Böckmann

Ein lüttje Diern harr grote Not;
Mudder, Vadder — beid wiern dod,
Armut harr sei bannig dråpen,
sei harr kein Stuf, kein Puuch taun Schlåpen;
wat s' an'n Lief harr, wier ehr bläben
un 'n Kanten Brot taun läben,
den s' von einen Minschen kreech,
den Mitgefäuhl an'n Harten leech.
Verlåten wull's nu ehre Welt
un truucht up Gott in't wiede Feld.
Un as sei mit ehrn Knust so geiht,
up eins 'n Schnurrer vör ehr steiht.

Dei arm Diern gifft ehr Brod den armen Mann. Bild vun Pauli Ebner

Hei secht tau ehr: "Ik bün in Not",
un fråcht: "Hest du 'n bäten Brod?"
Dunn geef sei em åhn wenn un denn
ehren ganzen Kanten hen.
Un as sei wünscht em Gott sien'n Sägen,
kümmt ehr all 'n Kind entgägen,
un secht nu tau uns lütte Diern:
"Dienen Pudel harr ik giern,
Süh, wat wat is mien Kopp blot rod,
dei Küll hett bröcht mi in dees Not."

Dei Diern gifft dat anner Kind ehr Pudelmütz. Bild vun Caroline King

As nu dei Pudel wesseln deit,
ein tweitet Kind gliek vör ehr steiht,
dat bibbert dörch dei Küll so sihr,
denn dat harr kein Leibchen mihr.
Un as dat denn dat Leibchen kriecht,
sticht Freud up in dat lütt Gesicht,
un as dat noch nich ganz verschwunnen,
hett sik 'n drüddet Kind infunnen,
dat wull den warmen Rock so giern
von uns ach so fråme Diern.

Sei geef den Rock un güng denn stolt
binå nåkelt in den Holt
un seech denn in dei Düsterniß,
dat noch 'n klåmig Kind dor is.
Dat säd tau ehr: "Ik mücht för mi
gägen Küll dien warme Pie."
Dunn hett dei Fråme bi sik dacht:
"Dat is ja düster inne Nacht,
keinein ward mi so nåkelt seihn,
denn ik bün ja in'n Holt allein."

Dei arm Diern gifft ehr letzt Hemd en anner arm Kind. Bild vun Pauli Ebner

As sei ehr Pie dei vierte harr gäben
un nix wier ehr an 'n Lief mihr bläben,
passiert 'n Wunner up ein Mål:
Do prasseln Stierns up sei hendål,
Stierns, dei güllen Dålers sünd
för dat ach so fråme Kind.
Un dor s' hett linnert anner Leed,
kreech s' noch 'n fienet Linnenkleed.
Dat bünzelt sei taun Schört tausåmen,
in wecker nu dei Dålers kåmen,
un as sei Dålers wiern upsöcht,
würn's all nå Hus henbröcht —
dei välen Dålers rund un blank
as Riekdaum för ein Läben lang.