Tau'n Anhören hier klicken:

Vertelln deit Rudi Witzke in vörpommersch Platt.

Toierst will ik Juuch maal up Koorten wiesen, wo de Trolle un de Pukken leven.

Ole Koort vun Norwegen. Hier sünd de Trolle tohuus.

Ole Koort vun Sønderjütland. Düt is dat Pukkenland!

Koort vun't Riesengebirge, Rübezahls Riek

Denn söök ik un söök, wat bi uns för Geister husen kunnen. Ik finn keen Spuur. Nich in de Höhl vun Sebarg, nich mang den Wacholder in'e Heid, nich in'n Nävel över de Kuhlen vun't Lavenstedter Moor.

Riesengebirge, maalt vun C.D. Friedrich

Ierst in dat Riesengebirge is en Geist tohuus. Hei is en Barggeist, de meist mit all sien Maten ünner de Ierd bi dat Erz, in dat Metall inslaten is, huust, sik Häng un Höhlen buut hett. Wenn hei denn maal up de Ierd na buten kümmt, kümmt hei as en Mönk orrer in anner Verkleden.

Rübezahl as Wilde Mann

Rübezahl as Mönk, maalt vun Moritz vun Schwind

Hei kann ok as elkeen Deert na baven kamen,
as Boomstubben, as en Haas un en Minsch.
Hei is de Herr vun dat Weder. Hei schickt Dunner un Blitze,
in de Bargen lett hei den Wannerer halsæwerkopp in dichtes Schneidrieven üm sien Leven strampeln.

Gegen gaude Minschen is hei fründlich,
hei liehrt se de Heilkrüder un beschenkt Arme,
schüfft den Holtwagen, wenn de Pierd to mööd sünd.
Ja, hei helpt de Pierd bi ehr Arbeit!

Sien Maten, sien Unnerdaan, de Barggeister,
kaamt nie na baven an't Licht vun Dag.
So gifft dat vun de nix to vertellen. Orrer doch:
Se schütten de Schätz, de Erze un anner Saken vör de Minschen.
Wenn de maal mit uns Ierd Schindluder drieven —
so as mit den Såltstock in Gorleben
orrer dat Öl in'n Grund vun den Ozeaan in'n Golf vun Mexiko —
denn ward dat leeg mit uns.
Sei helpt denn ok de groten Wadertrolle baven un ünnen an uns Ierdkugel, de Pole, un dükert den Golfstroom, dat dat bi uns aasig kold ward. Un denn?

Rübezahl

Dat weer vör Tieden maal in't Riesengebirge.
Rübezahl, de Herr vun de Barge, weer siet 999 Johren nich to de Minschen ut sien Höhlenriek kamen, wieldat hei vun ehr falsche un lege Oort de Nääs vull harr.
Vun enen vun sien Dwargen kreeg hei to weiten, dat de meisten Minschen nicht miehr an ehm glövten und de feniensch utlachten, de ehm üm Hülp repen.
Vergrellt beschlööt Rübezahl, up de Ierd trüüchtokamen, üm de Minschen en Lex to verpassen, de se ehr Leven lang nicht miehr vergeten schullen.

In de Bäuker kannst nalesen, woans hei dat fröher mit de Minschen dreven hett. Nu bün ik spannt, wat wi in de negsten Johren vun de Sneikopp un dat Riesengebirg hören ward.

De Sneikoppe, Rübezahl sien Barg, in'n Winter

Orrer hett hei al de Wöstentrolle beden, uns dissen Sommer 2010 ornlich intobäuten? Dat Korn up'n Acker wüss nich ornlich, de Küürn bleven lütt. De Mais weer kneihooch un nich mannshooch. De Bläder vun de Zuckerröven hüngen welk.
Spargel harr dat so gaud as gor nich geven.

Monster in de Wööst

Egenlich nehm sik Rübezahl enkelt Minschen orrer en Haud, de wat bereten harrn, to Boost und nich de ganze Natuur un alle Minschen. Wokeen vun uns kann aver seggen, dat hei allens daan hett, de Natuur to bewohren?

Jüst dunnert en Tornado över't Huus. De bruukt för een Kuntrullfloog vun een Stunn so an 600 Liter Kerosin. Sei fleigen meist to drütt. Dat sünd den 1800 Liter.
Een lüttes Auto bruukt 6 Liter up 100 Kilometer.
In Afghanistan duurt de Kuntrullflöög noch wat länger. Un so an teihn maal drei Kuntrullfleiger sünd ünnerwegens. Nehmt wi noch de Airbusse mit Urlauber an een Dag dortau, denn ward mi schwummerig.