Schokoladeneier bemalen

Fru Oosterhaas, warrt hoge Tied!
Dat Oosterfest is nich mehr wied!
Is ok de Snoopkraam al torecht?
Bloots Höhnereier — dat weer slecht!

Dor mutt ok Schokolaad bi ween!
De Kinner stimmt dor övereen:
Bloots Höhnereier? Danke, nee!
— De Höhner denkt dor liek as se.

"Dat wüllt wi menen! Denn uns' Ei
höört nich bemaalt un is to schaad!"
Fru Haas seggt: "För de Malerei
döögt dat veel mehr as Schokolaad!"

"De Schokolaad bemaalt sik slecht.
De Farv, de höllt dorup nich recht.
So faken ik dat övermaal —
dat is to glatt, de Farv glitt daal!

Weer dor de Butensied wat weeker,
wat ruger ok, denn wöör dat seker —
Momang, ik heff dor en Idee ..."
Un husch! Al üm de Eck is se!

Denn warkelt se un schruuvt un kloppt
un rennt un wuselt, hüppt un hoppt
un buut en groten Kassen op.
Fru Haas, de hett en plietschen Kopp!

De Mal-Maschien, de se erfindt,
maakt sacht dat Ei vun buten warm,
so dat dat en ganz beten smölt.
Denn kümmt de grote Hebelarm
un maalt dat Ei vun Schokolaad
(opleevst vun Vullmelk un vun Lindt)
mit schöne Munster, ganz geswind.
Dat ganze warrt denn afgeköhlt.
De Farv, de mit de Schokolaad
sik so verbindt,
de hölt!

Man to, vertellt
de ganze Welt:
Fru Haas kümmt Oostern nich to laat!
Dat gifft bemaalte Schokolaad!


Text: Marlou Lessing
Animation: Thomas Seemann
20.3.2016


na baven