Mien Breef an den Oosterhaas

vun Billa Frerich

Leev Ooster-Mümmel, gifft dat di?
Ik wüss dat geern un weet dat nie.

Mien Öllern gaht an'n Oosterdag
mit mi in'n Woold, wat ik geern mag.
Dor gaht wi denn op Eierjagd,
un jümmer wedder finn ik wat.
Kann't ween, dat dat mien Öllern maakt?
Orr, Oostermümmel, büst du dat?
Plietsch bün ik: Ik bestah dorop,
vörweg to gahn, un acht ok op,
dat nich mien Öllern wat verstekt,
keen Oostereier wohin legt,
un dat (ik bün keen dummes Kind!)
ok ehre Taschen lerrig sünd.
Man Papa seggt: "Dor blenkert wat!",
un Mama seggt: "Wat is denn dat?"
Denn jump ik hen un finn en Ei
in't Ünnerholt — is't Töverei?!

Un knapp bün ik torüch op'n Weg,
seggt Mama: "Du, ik glööv, ik sehg
wat Buntes dor mang Büsch un Bläder!"
Denn jump ik hen — en Ei al wedder!
Denn fraag ik Mama: "Un de Haas?
Hest du den ok sehn, dor in't Gras?"
"De Haas, mien Deern, is wiss al weg!
Hett woll hüüt Morrn sien Ei dor leggt!"
So geiht dat den Spazeergang dör —
de Eier warden mehr un mehr!
Leev Oosterhaas, is dat dien Wark?
Wo kann't sünst ween, dat ik nix mark?
Ik heff ok seggt, ik gah alleen
in'n Woold, un denn wüllt wi mal sehn!
Man dorför kreeg ik keen Verlööv,
wiel dat in'n Woold Gefohren geev,
un dat ik ok fein seker weer,
gaht s' bi'n Spazeergang achterher...

So weer dat ok in düssen Johr.
Trickst miene Öllern? Orr is't wohr?
All annern seggt, de Oosterhaas
is bloots en Märken, bloots en Spaaß.
Och Oostermümmel, segg doch an!
Wat du ok seggst — ik glööv doran!

Dat mutt wiss wohr ween, denn de Oosterhaas "Hanni Hase" wahnt in Ostereistedt un hett en egen Poststempel un sogor en egen Breefmarke!