De Wiehnachtsmann un sien ne'en Knecht

vun Hannes Frahm


Düt Johr hett de Niklaas mit dat Wedder noch mal Glück hatt. Lütt beten Snee un Ies, aver em is nix passeert. Alle Göörn hebbt de Stevel vull mit veel Bontjes un Schokolaad kregen. Dormit is de Niklaas för düt Johr fardig.

Nu is de Wiehnachtsmann an de Reeg. De flietigen Hölpers sünd al düchtig dorbi un wickelt dat Speeltüüch in Geschenkpapeer in. Dormit de Wiehnachtsmann de Paketen ok ni vertuuschen kann, kummt ob jeedeen Paket en Opklever mit den Naam vun dat leve Kind, de dat Geschenk ok hebben schall. Sodenni warrt allens op den Sleren rop packt, dormit de Wiehnachsmann tiedig losfohren kann.

Düt Johr is aver allens anners as in de verleden Johren.
Dor hett doch nu kort vör Wiehnachten so'n EU-Kommissor op een vun de doren Lobbylüüd in Brüssel höört — so een vun de Europa-Regeern dor. Se heet "Kommissar", fangt avers keen Verbrekers nich, nee, se denkt sik Gesetten ut.


Sooo'n groot Huus hebbt se dor in Brüssel!

Un düsse Dröömbüdel vun EU-Kommissor hett — ahn to Överleggen, wat he dormit an Ündöög maken deit — en Gesett rutgeven, woneem binnen steiht, dat jeedeen, de in en frömm Huus oder Stuuv ringeiht, sik de Schoh un ok de Stevel uttrecken mutt, un dat, bevör he in de Stuuv ringeiht!

Düt ne'e Gesetz gellt dormit ok för unsen Wiehnachtsmann!
Jeedeen kennt unsen Wiehnachtsmann un jeedeen weet ok, dat de Wiehnachtsmann al en olen Keerl is un sik nich mehr to sien Fööt un sien Steveln bücken kann, üm de ut- un wedder antotrecken. Dormit verleert de Wiehnachtsmann Hilligavend veel to veel Tiet bi dat Utdregen vun de velen, velen Geschenken för de velen leven lütten Kinner op de ganze Eer.

Rasch weer över dat Job-Center en Knecht söcht worrn —— en Stevelknecht.

Düsse Stevelknecht mutt nu ja nu ok noch mit op den Sleren rop un bi jeed Tour mitfohren. Düsse Keerl bruukt je ok noch veel Platz op den Sleren, de ja för de Geschenken dor ween mutt. Nu in noch weniger Platz op den Sleren für de velen, velen Geschenken för de leven Kinner op de Eer un de Wiehnachtsmann mutt dordörch ok noch bannig veel mehr Touren vun sien Wiehnachtshütt to de Kinner maken un för grote Geschenken is faken keen Platz mehr, düsse Geschenken blievt denn stahn för ... ja, villicht för de neegsten Wiehnachten.

So, leve Kinner, nu weet jüm all, worüm düt Johr de Geschenken vun den Wiehnachtsmann recht wat lütter utfallen doot as de vun de verleden Johren.


20.12.2022


na baven