Hier bün ik nochmaal wedder!
Juuch Murkel.

As ik hüüt up ehrn Schoot seet,
höör ik de Fru mit den Huusherrn snacken.

"Ik glööv, wi köönt Murkel in de neegsten Daag na buten laten! De
Winter is överstahn!" Un dorbi strakel se mi över den Rüüch.
Wat dat wull warrt?

Freten warr ik villicht finnen, aver wokeen eit mi denn un baadt mi
in warm Water? Dat köönt ji nich maken, mi utsetten! Fies is dat!
Ik heff al so veel Vertruun, kiek, ik rull mi gor nich mehr to'n Kugel
bi ju! Och, worüm höört ji nich up mi?

Oh, oh, ik warr up Diät sett — Frieluft-Diät!

De beiden menen, dat ik nu noog Freten in den Goorn un in den Knick finnen wöör.

An'n Avend kreeg ik nochmaal lecker Röhrei un Wiendruven.
Ik heff mi den Buuk ornlich vullhaut!
Wer weet, ob ik in den Goorn sowat to freten finn!

Ji köönt dat Bild grötter sehn, wenn ji up klickt!

An annern Moorn nehm de Fru mi up den Arm un güng mit mi in den Goorn.

Ünnen an de Port hett se mi denn vörsichtig up de Eer sett.

Ji köönt dat Bild grötter sehn, wenn ji op klickt!

Oh, wat röök dat Gras schöön. Dat harr ik in'n Winter meist vergeten! Ik bün glieks wiederlopen.

Anklicken = Vergröttern!

Anklicken = Vergröttern!

Happs, de Käver is weg! Lecker! Endlich wedder wat Lebennigs freten!

Dat weer doch ganz wat anners as ümmer blots Röhrei! Dat weern Vitamine!
Un de Sünn schien warm up mien Rüch!

Mit mien Tung heff ik dat Gras afplückt. Ik kunn gor nich noog dorvun kriegen!

Ünner de Narzissen funn ik sogoor al en lütten Käver.

De Blomen stünnen ganz dicht an den Tuun, de heff ik ok probeert.

Hmm, Narzissen! Ik bün denn mal weg...

Denn bün ik dörch den Goorntuun up den Goornweg lopen. Dat geev för mi noch so veel to bekieken. Allens weer nie för mi.

Villicht finn ik in Sommer en lütt nette Fru.
Denn köönt wi heiraden un tohoop en Igelfamilie grünnen!

Dat weer schöön in juuch Minschenwelt!
In mien Welt ut Gras, Insekten un Nacht köönt ji mi nich folgen!
Ik segg Tschüß! (Anklicken = Vergröttern!)

Leev Kinner, nu segg ik Tschüüß!
Villicht seht wi uns in Sommer wedder!

Juuch Murkel

Lesen deit Antje Heßler in holsteiner Platt.