Hasenbesöök
Dat klingelt an de Huusdöör vun't Hasenhuus. In't Hasenhuus wahnt de beiden Stallhasen Klopper un Hoppel. Gau hoppel Klopper an de Döör un keek, wer dor klingelt.
Wat hett se sik verfehrt! Achter de Döör stünn de Oosterhaas. "Künnt juuch mi villicht hölpen? Ik heff keen Eier mehr. De sünd to Enn! Un in en poor Daag is al Oostern. Dor heff ik dat Hasenhuus sehn un dacht, fraag man mal."
Hoppel weer intwischen ok an de Döör kamen un stünn achter ehr Süster. Se nickköppen sik to. Se wullen dat mal versöken. De Oosterhaas freu sik. "Ik kaam denn moorn nochmal wedder vörbi! Villicht hebbt juuch denn ja al wat för mi!" un he sprung wieder.
Klopper un Hoppel keken sik an. Nu sull dat losgahn. Eerstmal müssen Eier her. "Dor mutt uns de Hehn Susi hölpen."
Hoppel un Klopper hebbt Susi vun de slimme Kniep vertellt, in de de Oosterhaas steken dä. Kunn Susi villicht hölpen?
Susi weer inverstahn un hett ok glieks Eier in enen Korv leggt.
Aver de Eier harrn noch keen Farv! "Weetst wat", meen Klopper, "wi fraagt Nadja, de lütt Deern ut dat grote Huus! De hett doch enen plietschen Kopp un weet seker enen Rat."
De weer ok glieks bereit to hölpen. Se haal Naverskinner ran. Mit Pinsel un Farv möken se sik an de Arbeit. Bald harrn se för luder Iever glönige Backen.
De Arbeit weer bald daan. In den Korv legen nu bunte Eier.
Annern Dag klingel dat wedder an de Döör vun dat Hasenhuus. De Oosterhaas weer wedder dor. Wat hett he sik freut! Vun de kunstvull bemaalten Eier weer he rein begeistert! Vergnöögt un mit en groot Dankeschöön trock he mit den Korv vull bunte Eier wieder.
|
|||
Fotos un Text: Antje Heßler
25.3.2016 |