Caspar vertellt:
Sture Esel, stolte Pfau


 

 

I-AAH, I-AAH, I-AAH!


Juuch Caspar is wedder dor!

Dat letzt Mal heff ik Juuch vun mien Ümtoog up de anner Wisch vertellt.
Vörher kregen wi en Halfter üm den Kopp.

 

Wat dor up den Weg na de anner Wisch noch passeert is, mütt ik Juuch vertellen! Vör mi lepen twee Cousinen, Stina un Tekla.


Seht Ji, wi hebbt alle Halfter üm — bloots Stina nich!

 

 

Stina weer en smucke Deern!
Se harr noch keen Halfter üm.

 

 

 

Se harr wull keen Lust mehr, noch wieder to lopen.
Se legg sik ganz eenfach meern up den Weg daal.

 

Denn wölter se sik in den Sand.
All veer Been na baben!

Stina wull un wull nich mehr wieder!

Dor müss de Baas kamen.
De legg ehr en Halfter an un trock Stina an en Lien wedder up den Weg!

Se weer aver störrisch un wies sogoor de Tehn!

Endlich güng dat aver doch wieder!


Uff! Stina gifft na! Endlich geiht dat wieder!

 

Nevenan is en staatschen Buurnhoff mit enen groten Park rundüm.

Ut den Park höört wi jeden Dag en Deert luut schrien.
Höör sik an as "hijau"! Wer dat wull weer?

 

Endlich hebbt wi dat Deert ok mal sehn!
Dat weer ja en ganz smucken Vagel, en Pfau!

Up de Kopp harr he en lütt Kroon!
Sien Hals strahl in kräftig blaag.

As wi neger kemen, schreeg he glieks wedder luut hijau!
So luut, kunnst meist bang warrn.

Wat harr he för bunte un smucke Feddern!
De glitzern in de Sünn.
Up jede Steertfedder weern Ogen.

Un denn slöög he ok noch mit de Steertfeddern en groot Rad!

Dat müss ik doch allens mien Modder vertellen.
Wüllt höpen, dat ik bald mal na Huus kaam.

 

 


För hüüt segg ik eerstmal wedder Tschüüs!

Ik kaam bald wedder!

Juuch Caspar

 


Un hier warrt mien Geschicht vörleest:


Lesen deit Antje Heßler in holsteiner Platt.

 


18.7.2010


na baven