Dat kannst mi glööven!
Erfolg hebben

vun Heiner Zumdohme

To'n Anhören hier klicken:
Lesen deit Heiner Zumdohme.

In de tauken veer Wäken bi de Fautballweltmeisterschaft gaiht dat dorümme, Erfolg tau hebben. Aower nich bloß bi'n Fautball oder bi'n Sport, uk in use Läwen gaiht dat faoken ümme Erfolg. Höger, drökker, wieder un bäter as de anneren tau kaomen, dat is faoken dat groote Ziel. Drökker, denn bloß so kann ik winnen. Höger, denn bloß so kann ik Erfolg hebben. Wieder, denn bloß so kann ik an'n Ball bliewen. Bäter, denn bloß so kann ik berühmt wärn. Drökker, denn wekke tau laote kummp, denn bestraoft dat Läwen. Immer dran bliewen un up de Sünnensiete staohn. Höger, ik will hoch henut, hebb mi groote Ziele sett't, Karriere maoken un Geld verdeenen. Wieder, ik will wiet kaomen, ik will dat tau wat bringen. Bäter, ik will vörne mit dorbi wän, immer bereit wän, tau scheeten.

Aale dat is faoken dat Läwensmotto van nich minne Lüe van Daoge. Fit wän, denn wekke rastet, de rustert. Immer an'n Ball bliewen. Nix utlaoten in 't Läwen. Drökker, höger, wieder, bäter.

Ik kenn aower uk de anneren. Ähr Wiese, in 't Läwen Erfolg tau hebben, heet: langsamer, deeper, ruhiger. Langsamer, denn bloß so kann ik bewusst läwen. Deeper, denn bloß so kann ik de Saoken uk maol würklich up den Grund gaohn. Ruhiger, denn bloß so kann ik würklich tau mi kaomen. Langsamer, denn bloß so find ik tau mi sülwens. Deeper, so find ik den Sinn van mien Läwen. Ruhiger, denn bloß so find ik würklich Tiet tau'n Läwen. Uk dat is faoken dat Läwensmotto van nich minne Lüe in use Daoge, denn inne Ruhe ligg de Kraft. Wat helpt di Geld un Erfolg, wenn de würklich wichtigen Dinge in't Läwen nicht tau betaohlen sünd? Laot us dat langsam angaohn.

Wat is nu richtig in 't Läwen? Giff dat öwerhaupt richtig oder falsch. Faoken bün ik hen- un herräten un weet nich, wor mien Weg utsütt, üm wüklich erfolgreich in mien Läwen tau wän. Drökker, höger, wieder, bäter oder langsamer, deeper, ruhiger. Wi dröfft nich baide Sieten gägeneenanner utspälen. Ik glöwe, dat giff masse Wäge, dat groote Ziel in use Läwen taumeute tau gaohn. Wi dröft aower Gott immer wär bidden, dat he us den richtigen Weg wieset un us nich alleene lät up den Weg, dat Tor, dat Ziel van mien Läwen tau tröffen.

Bi us up plattpartu.de finnt man nu utsöchte Bidräge van disse Radiosendung.