Dat kannst mi glööven!
Bäen

vun Heiner Zumdohme

To'n Anhören hier klicken:

Lesen deit Heiner Zumdohme.

Ick bin bi eine Familie taun Middagäten inlaoden. Meistied weit ick all, dat ick dann vörbäen mott. Faoken fraoge ick dei Lüe uck woll: "Willt wi vör't Äten uck bäen?", weil sei dor van sülwens gaor nich mehr up kaomt. So was dat uck ditmaol. Ick frög, off eine van dei Kinner vörbäen wull. Un dat eine Wicht sä: "Wat schall ick denn bäen! Ick kann kien Gebätt!" As dat woll nich anners schull, häbb ick dann vörbäet.

Eine Wäken laöter bi eine annere Familie. Ick har mi all up dat glieke Spill instellt. Man kiek an. Dei lüttke Junge mit siene drei Johr mössde vörbäen. Ick was heller verwunnert, as hei ein Gebett upseggen dö, dat vör ein Dreijöhrigen schwor wän mössde. Man sei seeten jeden Middag mit Oma, Opa, Mama, Papa Bräuers un Süsters tauhope an'n Dischk. Un Oma bäede immer vör bi't Äten. Hei lusterte alltied tau un so kummp et, dat hei mit siene drei Johr uck all bäen kunnde.

Mi köm dor domaols ein Beläwen in 'n Sinn, wat all ein paor Johr trügge ligg. Dat was in 'n Fleiger van Chicago naoh Frankfurt. Up Maol füng dei Fleiger heller an't Ruckeln. Alle mössden sick hensetten un faste maoken. Uck dei Stewardessen dröften nich mehr ümtauloopen. Un mit einmaol sackte dei Fleiger heller deip daol. Dei ersten füngen all luut an tau bölken. Ick füng an tau bäen. Un kiek an, dei Kerl, dei gägen mi seet, uck. Un hei flög masse, vertellde hei mi läöter. Aower in dissen Oogenblick was uck hei kriedewitt ümme Näsen un wüssde sick nich anners tau heilpen as tau bäen. "Dat wör siet 30 Johr woll dat erste Maol!", mennde hei. "Gaut, dat miene Mama jeden Aowend mit us bäet häff!", sägg hei wieder. Un jüst dat Gebätt was üm in dissen Oogenblick in 'n Sinn kaomen. Un dann sägg hei: "Ick roop glieks fortsen miene Mama an un will ehr daorför danken, dat sei mi nich blots bibröcht häff, wor man anständig läwt, dat sei us vörläwt häff, dat man Gott trawen draff!"

Wat moakt Kinner, wenn sei laöter villichte maol in dei süftige Situation kaomt as wi beide dor in den Fleiger? Wor haolt sei sick an faste, wennt in't Läwen up einmaol Barg daol gaiht un du nich weißt, wor man sick an faste hollen kann?

Kinner bruukt Werte, jaoh! Aower sei bruukt uck dat Vertrauen, dat dor ein is, tau den sei roopen käönt, wenn sei sümmes nicks mehr daun käönt. Wor schöllt Kinner dat van wäten, wenn ehr dat nich säggt un vörläwt werd?

Bi us up plattpartu.de finnt man nu utsöchte Bidräge van disse Radiosendung.