Dat kannst mi glööven!
Superstar

vun Pfarrer Heiner Zumdohme, Damme


To'n Anhören hier klicken:


Lesen deit Heiner Zumdohme.


Düütschland söch dänn Superstar! — de Fernsehsendung kennt wisse väle. Man seukt wi denn wüklich — den Superstar? Manges hebb ik dänn Indruck, will willt bloß beläwen waor sik besünners junge Lüe bit up de Knaoken blamweert un wi hebbt use Fraide daoran, waor se van de Jury dann fardick maokt wärt, weil se sik sülwens öwer de Maoten öwerschätzt hebbt. Een Superstar wärt van de meesten, de daor mitmaokt hebbt, kieneene. Wecke Glück heff, de sing noch up Mallorca uppe Ballermannmeile sien Lied, ehrder hee uk daor drokke bi öwer is!

Man ik find disse Sendung uk interessant! Waorüm? Weil ik daor junge Lüe beläwe de heller an ähre Einmaligkeit glöwt, un de so gerne beläwen wödden, dat dat uk annere maol mitkriegen daut. Un se traut up dat Urdeel van de Jury. Se wät't, de nähmt kien Blatt vör´n Mund. De segget, wat se van ehr haolt, klaor un düüdelk. Un bange sünd de Kandidaten daorför nich. In´t Gägendeel! Se wät't, wat ähr blaiht. Und se nähmt dat in Koop, eenmaol tau beläwen, dat man ähr — aohne wenn un aower — de Waohrheit säch!

Mi schinnt, dat is disse jungen Lüe jüs so wichtig as würklich tau gewinnen. Endlich säch mi daor maol eene de Waohrheit in't Gesicht. Endlick weet ik, waoran ik bün. Aals is bäter, as dit ewige Wischiwaschi un aals is half so leip.

Wenn dat so ist, dann kann ik disse jungen Lüe gaut verstaohn. Denn daoran fählt us dat: Lüe, de segget, wor se vör staoht, de ähre Meenung segget, uk wenn dat annere maol kellt. Jüs junge Lüe hebbt een Anspruch daorup de Waohrheit öwer sik un ähr Läwen tau erfaohrn. Se willt nich, dat wi mit ähr so as mit rohe Aier ümmergaoht. Se willt ne ehrlicke Meenung.

In ersten Ogenblick kellt dat faoken, siene Fähler tau seihn! Man in tweeden Ogenblick mennt dat: Hier nümmp mi eener Ernst. Hier will mi eener würklich helpen!

Man bruukt wi daorför "Dütschland söch den Superstar!" un eene Jury. Kunnen dat nich Öllern, Fründe, Naohbers jüst so daun, wenn se nich bloß aale Wägens de Ooge tautokniepet?

Väle junge Lüe willt wäten, waoran se mit sik sülwens sünd. Wecke dat weet, de bruukt kien annern Bewies dorför, de hei of sei einmaolig is — de bruukt uk kien "Dütschland söch denn Superstar!"


Översicht över de Reeg
"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


18.12.2016


na baven