Bild: Rudi Witzke
Bild: Rudi Witzke

"Lütt Glück" un groot Malöör

Een Kommentaar vun Holger Vogt


An'n 20.8.02 hebbt wi hier in de Rubrik "De Welt un Gott" een Vertelln vun Anke Nissen rutbröcht: Lütt Glück. To düt Vertelln hebbt wi en Kommentaar vun uns Besöker Holger Vogt ut Lübeck toschickt kregen, de uns so goot gefull, dat wi em nu ok hier praat stelln:
  "Lütt Glück" is ja nu afsluut keen vun de Art "Geschichten op Platt", de wi Minschen allto giern lesen.

Wo blivt denn dor de fründliche Ohnsorg-Attitüde, na de wi för en harmonisch Leven lengen? Wo blivt denn dat goode Enn: de plietsche Olsch, de de Administration vun so'n Oolen-Afstellhus över is? Wo blivt denn dat goode Geweeten, dat wi as Puch bruken, to en geruhsam Inslapen?

De Realität ut dütt Vertellsel överschwemmt de Lesers as de groote Floot Regionen vun half Europa.

Avers, wat hett Noah mit een Oolenhus un Babel mit een över de Dieken gahende Hochwater to dahn?

Orrer möten wi fragen, wat Noah mit Babel .... orrer Babel mit een Olenhus ... orrer een Olenhus mit uns Parlament..?

Wi fraagt leever ierst gar nich; wieldat wi dat sülmst antern kunnen, bi een lütt beten Nadenken.

Club of Rome, Grenzen des Wachstums, Globaliseerung, jeden Urlaub mit Fleeger orrer Ski ünnerwegens, winterdags barfoot in de Stuuv sitten und Heizung opdreihn bi anlehnte Fenster un Erdbeeren eeten, Regenwald plattmaken för jeden Dag Steak eeten, Autos mit 300 PS över de Autobahn jagen as Levensopgav..., Wahlplakate statt Parteiprogramme ...

Lütt beeten Luxus is nix gegen intowennen, avers gegen lütt beten Trüchhalen wiss ook nich.

Sünd wi de, de Gott verschont hett, wieldat wi keen Fehlers maakt hebbt?

Dücht meist so, denn de Kanzler meen ja, mit 40 Mio. Euro kunn he weet wat wedder heilmaken. Dor heff ik dacht, he is en ganzen Sööten eenen. Denn hett em woll een vun sien Beraaders vertellt, datt vun 40 Mio. Euro man eben 400 Hüüs wedder opbuut warrn köönt. Denn hett he naleggt, op 10 Mrd. Euro un dat Verspreken, keeneen schall dat na de Floot leger gahn as vörher, un nu is he allwedder in'n Rückwärtsgang un prahlt, Hülp is meent as Hülp för sik sülmst to hölpen. 15.000 Euro för een tweigahn Gasthoff; dat is as een Druppen op en heiten Steen! Orrer is dat Wahlpropaganda? Kunn ween, dat he anners spraken harr, wenn sien eegen Hus ünner Water wesen weer. Is he bloots een Bangbüx, de (för Wählerstimmen?) grootmuulsch Liehrers as "faule Säcke" schimpt hett? Orrer is he ook tostann, alle Lüüd, de nix to beklagen hatt hebbt, in jümehr Kass to langen, den nationalen Schaden wedder op de Reeg to bringen un Strukturen för een ringer Afwärme un för een naturgerechte Överschwemmungsrebett vun uns Flüsse to sorgen? Keeneen vun uns Vöröllern wull een Huus buut hebbn in een Wisch, de vun Water överschwemmt warrn kunn.

Nu kümmt dat dorop an, watt wi as Fundament för uns Staatswesen setten. Twüschen Morast un Beton schull dat ook levende Ierd geven!


Holger Vogt

3.9.2002


na baven