Ünnern Bom

vun Behrend Böckmann

Bi Lichtenschien sik mål besinnen,
mål Rauh von'n rugen Olldach finnen,
ünnern Bom mål Leeder singen,
hürn woans dei Klocken klingen,
hollen ünnern Bom Andacht
as Teiken för dei Stille Nacht.

Un wenn dat buten deit denn dunkeln,
Un Lichten fangen an tau funkeln,
ward dei Klingel uns verkünnen,
dat wi ünnern Bom wat finnen:
Krüff un Kind, weck Wihnachtspracht,
as Anfang von dei Hillig Nacht.

Mit tauig Ogen nu beläben,
dat Engels üm denn Bom daun schwäben,
Gloria up denn Vadder singen
un Minschen disse Botschaft bringen:
Dei Heiland ut dat Häbentelt,
hei is nu ünnen up juch Welt.

Dei hillig Schrift deit ok berichten:
dat Kind möt mit sien Öllern flüchten,
denn Order harr Herodes gäben,
dat Jungs nich süllen œwerläben,
un måken mit dat Kind sik furt,
Ägypten is dei säker Urt.

Datsülwig deit ok hüt passieren,
dat Minschen anne Grenzen frieren,
dei väl Pien hemm' up sik nåhmen
üm nå Europa rintaukåmen,
un sitten in ehrn deipsten Drom
all ünner einen Dannenbom.