Dat kannst mi glööven!
Glücksiälig Niejoahr!

vun Wilfried Theising, Vechta


To'n Anhören hier klicken:


Lesen deit Wilfried Theising.



Jetzt denk ji, dat ick mi verdoahn hebb. Niejoahr is doch eierst in veer Wiäken an 1. Januar. Dat stimmt. Ick meen owwer dat niee Kiärkenjoahr, dat an 1. Advent anfangen häff.

Dat fäng nich met Böller un Glase anstauten an. Dat nie Kiärkenjoahr kümp sachte to us. Ett fäng still an un nich met luut Spektakel. Wie hört doa nich so vull van. Manges ein krigg dat villicht uk gor nich mit. Man mott mär noa binnen lustern, dat man ett metkriegen dött. Dat nie Kiärkenjoahr is ne Inloadung an us, jeden Dag besünners met Jesus to liäben. Van Em ut is dat kloar, dat he doar is. He löpp alle Wiäge met, de wie goaht. He weekt nich van usse Siete. He bliff auk bie us, wann wi up alle krummen Wiäge harümlaupt, de manges so verlockend sind. He is trü bi us, wat immer wi dot.

Doa stellt sick de Froage, off wi auk trü to em sind. Is us doan geliägen, met em to liäben? Oder is us dat manges lästig? Dat nie Kiärkenjoahr loadet us in, denn kiärklicken Kalenner to seihn un doanoa to liäben. Ett is as eine Brüggen, woröver wi mit Jesus dör 't Joahr goaht un wi üm Dag för Dag, Sünndag för Sünndag beter kennlernen könnt.

Un de grauten Feste, so as Wiehnachten, Ostern, Himmelfohrt un Pingsten, un uk de Noamensdage van de Hilligen willt us helpen in ussen Glöwen. Se wiest us, dat usse Härgott midden unner us is. He is nich wiet wegg. He freit sick met us un fiert met us an de Sunnendage van usse Liäben. Un he grient met us, wenn wi tofräden sünd un lachen könnt, un truert met us an de düsderen Dage. Doarüm is he up de Wiält kuommen.

Dat niee Kiärkenjoahr fang immer mit denn Advent an. Denn Advent helpt us jedes Joahr, van Nien weer antefangen. Ett is de graute Inloadung van usse Härgott, met em to liäben un em to söken Togliegs kümp he us in de Möte un sög us. Wann wi bienanner sind, he un wi, dann is usse Liäben siälig.

In düssen Sinn sägg ick noch eenmaol: Glücksiälig Niejoahr!



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


10.2.2019


na baven