Dat kannst mi glööven!
Dat Lecht van een Keesen kann de Welt in 'n anner Lecht stellen

vun Heinrich Siefer


To'n Anhören hier klicken:
Lesen deit Heinrich Siefer.


Bünd Ji all maal mit een Keesenlicht in Hannen in Düüstern naa buten gahn? In de Sömmertied, wenn dor kien Wind, kien Zug is, dann geiht dat woll. Man so as disse Daage, wor dat manges heller waihen deit, is dat is nich so eenfach. Du kannst versöken, dat Lecht mit diene Hannen Schuul to geven. Man dat geiht meist nich lange good. Kummp de Wind wat fosser, is dat Lecht gawe ut.

Un doch is so een flackern Keesenlicht wat anners as dat grelle Lecht van eene Taskenlucht. Keesenlecht röögt us an. So een Keesenlecht in Düüstern bloß för sik allennig maaket de Welt noch nich hell, man doch kann et dat Düüster, Not un Bangte verdriewen. Un wenn dor väle annere mit Keesen in Hannen d'rtokaamen doot, dann kann sik wat rögen.

1989 was dat — dit Johr nu all 30 Johre her: Mit Bäen, Andachten un Talglechter in düüster Tieden fang in Leipzig in de Nicolaikarken wat an, wat dann nich mehr uptohollen was. Lüüe mit Keesen in Hannen bringt tolessde Müüern to Fall, stötet de, de dat Seggen hebbt, van ehrn Thron.

Ja, dat Lecht van so eene enkelden Keesen kann wat Grootes tostanne bringen. Lüüe mit Keesen in Hannen sünd nich up Krawall ut un könnt jüst dorüm de Welt verannern. Dat Lecht van een enkelde Keesen heff een groote Macht. Et maakt aal de Moot, de in Düüstern ünnerwegens sünd. Mit dat Lecht van een Keesen könnt sik weer torechte finnen.

De Wiehnachtstied ligg nu all wedder achter us. Man disse Tied van' n Advent of an bit naa Drei Käönige wieset us aaltied weer van Neien: Et giv dat Düüster. Et giv Not un Bangde. Man dat Düüster heff nich dat lessde Wort. Aal de Keesen, de wi in de Tied ansticket hebbt, vertellt us dit: Wäs nich bange, dat Lecht kummp di intomeute, uk wenn dat noch nich aale Daage so utseihn deit. Mag dor kaamen wat will, mit dat Kind van Bethlehem, mit de Wiehnacht is een för aale Maal dat Lecht in de Welt kaamen, wat aal dat Düüster besiet schuvv. Kiene Grenze, kiene Müürn holt dat Lecht up. De Lecht van Bethlehem geiht mit us — dör aale Tieden. Geiht mit us dör 't neie Johr 2019. Dag för Dag.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


19.5.2019


na baven