Dat kannst mi glööven!
Vincent van Gogh: De Buurn in 't Stroh

vun Heinrich Siefer


To'n Anhören hier klicken:
Lesen deit Heinrich Siefer.


Ik hebb mi verläden Johr den Kinofilm "Loving Vincent" — Vincent vull van Leevde — ankeeken, een Film bloß ut Biller van Vincent van Gogh maoket. Man mehr noch as de Geschichte, de de Film van 't Leven van den bekannten Maoler vertellen deit, röögt een de Biller an, de de Film wiesen deit. So as dat Bild van Lüüe, de lai in 't Stroh ligget.

De Arbeit is daon. Nu is Tied to'n Verpuusen un Verhaolen. Aal de Maihte könnt se achter sik laoten. Aal de Arbeit, de nödig wäsen is, dat dat Körn, dat Stroh wassen is: Pläugen, Ägen, un dann dat Saien. Jo, se hebbt heller knojet — man aals is good worn. Et heff sik lohnt. Nu schient se bloß noch bliede un froh to wäsen. Se laotet sik deep fallen. Nicks kann ehr nu noch wat an, so schinnt dat.

Arbeiten un Verpuusen, sik verhaolen, to Ruhe kaomen — dat hört tosaomen! Knojen un Fiern, Warkeldag un Sönndag sünd as Brauer un Süster. Mi dücht, wi mäöt vandaoge uppassen, dat us dat so bilüttken nich verloren geiht. De Arbeitswelt will, dat de Lüüe to jede Tied praot staoht. An'n levsten uk noch nachtens un an 'n Sönndag. Un wenn ik mi so ümmekieken do, dann denke ik manges uk, et giff veele Lüüe, de dat gor nich uthollen könnt: eenfach maol nicks doon. Sik deep fallen laoten. Sik loslaoten! So as de Buurn dor up dat Beld van Vincent van Gogh.

As't aale anfüng, un Gott Himmel un Eerne maokt har, do heff he sik achteran wat besiete sett't un nicks nich mehr daon. Sik eenfach bloß sinnig bekeeken, wat he maokt har. Un, so vertellt de Bibel, he was dor best mit tofräe. Aals was good worn. Dor fehlde nicks nich an. He kunn sik nu verpuusen. Un Jesus was dor nich anners. Wo faoken vertellt de Bibel, dat he sik bi siene Frönne ton Verhaolen daolsetten dö, nao aal dat Loopen un Doon, so as bi sien Frönd Lazarus, bi Martha un Maria.

To Ruhe kaomen, sik deep fallen laoten, mit aopen un fraidig Oogen ankieken, wat schaffet worn is — uk dat is nödig. Un dat deit good. Probeert Se dat eis maol ut.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


27.5.2018


na baven