Dat kannst mi glööven!
Vincent van Gogh: De Mann mit de Saiback

vun Heinrich Siefer


To'n Anhören hier klicken:
Lesen deit Heinrich Siefer.


Enne verläden Johr geev 't in 't Kino een Film, den sik veel Lüüe mit Pleseer ankäken hebbt: "Loving Vincent" — Vincent, vull van Levde. Een Film, tosaomenstellt ut Biller van den Maoler Vincent van Gogh. 1853 in Holland geborn, studeert he van 1885 of an dat Maolen in Belgien. He orienteert sik an de französken Künstlers Cézanne un Gaugin. He probeiert ut, maolt nich so, dat et de Lüüe forts gefallen deit. He maolt nich bloß dat, wat he süht, nee, mehr woll dat, wat he binnen sik föhlt, wenn he wat ankieken deit. In Paris lernt he löter Gauguin kennen un treckt mit üm to'n Maolen nao Arles in Südfrankriek. Veel Erfolg heff he dor nich. He wedd siene Biller nich quiet. Man Vincent maolt aalmanto. "Ik kann d'r doch nich för, dat de Lüüe miene Biller nich koopen doot. Man töv, de Dag wedd kaomen, wor de Lüüe begriepen wedd, dat miene Biller veel mehr weert sünd as dat Geld, wat ik för de Farwen utgeven hebbe", mennt he. Man de Lü säen domaols: "Vincent, kieneen mag diene Biller lieen, pass di doch wat an 'n Geschmack van de Lüüe an!"

"Quattkereie", sä he do, "ik maol so, un nich aners! Un ik kann nich aohne Maolen!" Was nicks mit üm to maoken. Hei maolde so, as he dat woll. Un he heff Recht behollen: Doont woll siene Biller kiener hebben — vandaoge kann se kieneen betaohlen.

So as dat Beld van den Buurn mit dat Saiback. Schients is dat Harfstaobend. De Sünne gaiht nett unner. Een Buur sait Körn up 't Land. Noch rechter Tied ehrder dat düüster weerd, ehrder dat anfang to freisen. He deit, wat nödig is, uk wenn 't noch wat duurt, bit to seihn is, of dor uk wat van weern deit. Un is 't nich so: Dat Brot wasset in 'n Winterdag.

Dat Beld passet to van Gogh. As wenn he sik sülvest dormit meent heff! Bedächtig, mit Gedüür un uk schients vull van Leevde to dat, wat he deit, strait de Buur dat Körn ut.

Mit sien eegen Aort un Wies to maolen heff Vincent van Gogh wat utsait, wat us vandaoge noch anröögt. Siene Biller wieset, wat sik binnen een röögt: Leevde. Totroon to dat, wat een süht un deit. So 'n Bild maokt uk mi Maut, dat to doon, wor mien Harte van vull is.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


20.5.2018


na baven