Dat kannst mi glööven!
Neie Wäge gaohn

vun Heinrich Siefer


To'n Anhören hier klicken:
Lesen deit Heinrich Siefer.



Aquarell: Kensise Anders.
Klick op to'n Vergröttern!

"Hebbt Vertroon to neie Wäge" — "Vertraut den neuen Wegen" — ein Lied, wat ik heller gern singe: in Kark, in 'n Chor of eenfach maol so för mi hen. Schreven heff dat in 'n Sömmer 1989 Klaus-Peter Hertzsch, Professor för Praktische Theologie ut Thüringen — domaols eigens för 'n Hochtied in siene Familge: "Hebbt Vertroon to neie Wege / up de us Herr us stellt! / He kummp us intomööte, / de Kummtied is sien Land. / De Döörns, de staoht wiet aopen, / dat Land is hell un wiet."
Ein Lied, wat twee, de sik mitnanner up 'n Padd dör 't Leven maoken willt, Moot maokt.

Man dat Lied wannert wieder. Domaols in 'n November 1989 wedd et in de domaolgen DDR bi veel Versammeln in Leipzig un annerswor sungen. Nu maokt dat Lied all de Lüüe Moot, de wat Neies verwachtet, de anner Wege gaohn willt, den ollen Padd nich mehr willt. Un et duurt dann ja nich lange un wohr wedd, wor dat Lied van sing: "De Döörns, de staoht wiet aopen — dat Land is hell un wiet!" Jao, dor, wor Lüüe sik mitnanner up 'n Padd maokt, ehr Vertroon in Gott settet, dor kann wat togange kaomen.

Veele hebbt to'n Anfang van 't Johr villicht överleggt, wat man sik so vörnähmen will, anners maoken will. Faoken schlöpp dat innen Alldag weer in. Manges troo wi us uk villicht nich noog to, üm dat wi bange sünd, dat wi dat nich schaffet. Dorbi mott ik an Abram denken. In 'ne Bibel wedd van üm vertellt.

Un de Herr sä to Abram: Treck weg ut dien Land, weg van diene Verwandskup, weg ut dien Öllernhuus, treck in dat Land, wat ik di wiesen wedd.
Ik will di to ein groot Volk maoken un di sägen. Dienen Naomen will ik groot maoken. Du schösst ein Sägen wäsen!

(Gen 12, 1-2)

Sik up 'n Padd maoken, dat Neie waogen, so as Abram, de sik up Gott verlatt un sik den Weg in ein frömder Land wiesen lätt. Dorto mögt dat Lied Moot maoken.

Un up dissen Padd sünd wi nie nich allennig, heet dat dor. Gotts Sägen geiht mit us, steiht över us as en Baogen, de Schuul giv, wat us en Dack in de Frömde geven deit. Hebbt Vertroen to neie Wäge — Gott geiht mit us, is över us, is üm us ümto. Dat heele Johr över.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


6.5.2018


na baven