Dat kannst mi glööven!
De Eern is use Mudder

vun Heinrich Siefer


To'n Anhören hier klicken:


Lesen deit Heinrich Siefer.


"Gaoh rut, mien Hart, un söök di Fraid, nu wor dat buten gröönt un blaiht.
Kiek an, wo moi de Bloomen staoht, se hebbt sik schmuck maokt aohne Maot."

Wöör ut 'n Lied van Paul Gerhardt. Över veierhunnert Johre olt. Een Lied, wat us dat Wunnerwark van de Natur beleven lätt. Besünners in disse Johrstied.


Teknen: Rudi Witzke

Un de Dichter is sik wissse: Gott heff us disse Eern geven, dat wi us an ehr frait. Gliekertied wieset dat Lied uk, dat wi van de Eern ehr Gaoben levet. Doch et is nich to överseihn: de Eern is in Gefohr. Wi hört van Klimawannel. Dat Ies an de Polkappen schmelltet. Wecken Stäen in de Welt mäöt de Lüüe bange wäsen, dat ehr Land nich van de Ozeane överspeult weerd. Annerswor is all siet Johren kien Drüppen Rägen mehr fallen. Wi sünd up den besten Weg de Eern to verneilen.
Aals nicks Neies. Vör 150 Johr heff de Indianerhäuptling Sitting Bull in Amerika 'ne Rede hollen, wor he doont all intomeute seihn heff, wat de Eern blaiht, wenn de Mensken sik nich ännern doot. He heff seggt:

"Erst wenn ih den lessden Boom daolkreegen hebbt, erst wenn dat Waoter in 'n lessden Waoterpaul verfuult is, erst wenn ih den lessden Fisk fangen hebbt, wedd ih villichte begriepen, dat man Geld nich äten kann. Ih Mensken gaoht mit de Eern ümme as mit 'n Saoke, de man koopen, verkoopen un utplünnern kann. Vergätet nich: De Eern is use Mudder. De Räöke van de moien Bloomen, de Reihe un dat Peerd un de Aodler an 'n Himmel, aale Deierten sünd us Breuers un Süsters. De hoogen Barge, Böome, Busk un Struuk un de greunen Wisken hört to een un de süvtigen Familge. Wenn 't de Mudder nich good geiht, geiht 't ehre Kinner up Duur uk slecht. Disse Eern hebb wi nich van use Öllern arwet, nee, wi hebbt se bloß van use Kinner utleihnt."

Wat de Sitting Bull dor doont to de witten Siedler in Amerikao seggt heff, was over uk do all nicks Neies. In 't twülfte Johrhunnert prootet de Hillige Franziskus in sien Lied van de Sünne all van Brauer Sünne, Süster Maand, Süster Waoter un Mudder Eern. Uk he mennt: Wi sünd een Deel van de Eern, sünd mitnanner verwandt. Wenn wi mit de Eern nich good ümmgaoht, vergaoh wi us uk an use Familge. Dorümme: Mensk, bruuk dien Verstand. De Eern bruukt di nich, man du bruukest de Eern: de Bööme, de Planten, de Luft to 'n Aohmen. De Eern is di van 'n Schöpfer in Hannen geven. Bewohr se!



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


1.10.2017


na baven