Passion 2013
Sönndag Sexagesimae

Klaoge in Kriegsnot

För dei Chormeester. Ein Klaukheitslied van dei Korachiter.
Gott, wi hörden dat mit use eigen Ohren, use Vaoders vertellden us van dit Wark, dat du tau ehre Lävtied fardigbröchdes, in dei Daoge van dei Vörtied.
Mit diene eigen Hand häs du Völker verdräben, dei aower inplantet. Du häs Nationen tweischlaon, dei aower utsaiht.
Man dei wünnen dat Land nich mit ehr Schwert, un ehr Arm bröchde ehr nich den Sieg; nee, diene Rechte was dat, dien Arm un dien lüchten Angesicht; denn du harrs an ehr Gefallen funnen.
Du, mien Käönig un mien Gott, du büs dat, dei Jaokob den Sieg geef.
Mit di stötet wi dei Leipen vör us daol, in dienen Naomen träet wi use Gägenspälers Platt.
Denn ick verlaote mi nich up mienen Baogen, uck mien Schwert kann mi nich helpen;
nee, du häss us vör dei Leipen vör us wohrt; aale, dei us hasset, beleggs du mit Schanne.
Wi loobet usen Herrgott äöwer den heelen Dag un prieset dienen Naomen dör äwige Tied.
Doch nu häss du us verstött un us mit Schanne beleggt, du treckes nich mit use Heer in dei Schlacht.
Du läss us vör use Feinde wegloopen un Menschken, dei us hasset, plünnert us ut.
Du lävers us af as Schlachtveih, unner dei Völker deils du us up.
Du verköffs dien Volk för'n Spottpries un dit Inkaomen bring di gornicks in.
Du sorgs för Rüffels van use Naobers, för Spott un Hohn bi aale, dei ümm us tau waohnt.
Du möcks us tau ein Spottlied bi dei Völker, dei Heiden wiest us blots noch Verachtung.
Miene Schanne steiht alltied vör miene Oogen un Schaom belegg mien Gesicht,
wägen dei liederlicken Wör van den Spötter, wägen den fünschk utkieken Feind.
Dat aals is äöwer us kaomen un doch häbbt wi di nich vergäten, us nich van dienen Bund reuklos losseggt.
Use Harte is nich van di weggaohn, un use Tratt hett dienen Padd nich verlaoten.
Doch du häss us wegstött nao den Oort mit dei Schakaole un häss Daok äöwer us leggt.
Harren wi den Naomen van usen Herrgott vergäten un tau einen frömden Gott dei Hannen uprischket,
wörd Gott dat nich naokieken? Hei kennt doch dei sinnigen Gedanken van't Harte.
Nee, wägen di werd wi doodmaoket Dag för Dag, behannelt as Schaope, dei man tau'n Schlachten utsöcht hätt.
Waok up! Worümme schlöpps du, Herr? Waok up, verstöt nich för ümmer!
Worümme verstopps du dien Gesicht, vergäss use Not un Verlägenheit?
Use Säle is daolböget in den Stoff, use Liew ligg up den Bodden.
Staoh up un help us! Mit diene Gunst erlöse us!

Psalm 44


Montage: Ludgerd Lüske. Klick up tau'n Vergröttern!


Südollnborger Platt: Ludgerd Lüske

Montierte Biller:
Fastentuch Münster Freiburg im Breisgau, Bild Thomas Maier/Wikimedia Commons
Ole Böker, Bild Tom Murphy VII/Wikimedia Commons

17.2.2013


na baven