Albert Schweitzer
© Wikimedia Commons, unbekannte Teikner

Albert Schweitzer

vun Karl-Heinz Sadewasser, Pastor i.R.


An'n 4. September 2007 warden dat nu al 42 Johr, dat Albert Schweizer storven is. As ik Student un en jungen Paster wier, hebben wi veel vun em höört un vertellt. Ein Konfirmandenmäten vun mi is Doktersch worden, as sei von sien Arbeit tau'n Gesundmaken in Afrika leest hett. — Is Albert Schweitzer nu al bi uns vergeten?

Hei wier al lang fardig mit sien Studium von dei Theologie, hei wier en ganz goden Orgelspeler, un in beides — Theologie un Orgelspelen — künn hei goot sien Brot verdeinen. Dor keem em tau Ohren, dat in Gabun in Afrika dei Lüüd mit ehr Krankheiten allein blieben möten, weil dor nich naug Doktors sünd.
Dat is den jungen Kierl so an't Hart gahn, dat hei noch mit 30 Johren Medizin studiert hett, un dorna güng hei na Lambarene. Dor hett Dr. Schweitzer sien Krankenhuus buugt un dei armen Patienten ut den wieden afrikaanschen Busch werrer gesund maakt.

Wat Jesus Christus seggt un daan hett, wier för den Doktor von Lambarene ganz

Albert Schweitzer
© Wikimedia Commons, unbekannte Teikner

wichtig un hett sienen Weg bestimmt an dei Siet von Minschen, dei kein Hülp funnen harrn.
En Bibelspruch vertellt dorvun. Jesus seggt:

"Allens, wat ji an einen von mien geringsten Bräuder daan hebbt, dat hebbt ji an mi daan."

Jesus möök sik mit dit Wort liek mit dei, dei hungern un frieren, dei krank sünd un arm. Hüüt wörr hei sik liek maken mit dei Lüüd, dei kein Utsicht up Arbeit un Familie hebben, un mit Minschen, de old, krank un vergeten sünd. Köönt wi denn noch an so'ne Ort Lüüd einfach vörbi lopen? Nee doch, seggt uns Bibelspruch, laat uns Minschen sien mit 'n Hart in dei Bost un nicht mit 'n Portmonee.

Gauden Dag ok.


16.12.2007


na baven