Dat kannst mi glööven!
Ein besünner Krüüzweg

vun Alexander Rolfes


To'n Anhören hier klicken:
Lesen deit Alexander Rolfes.


Bi 't Kardinal-van-Galen-Huus in Staopelfeld, dor giv dat einen besünnern Krüüzweg. De heff bloß drei Stationen. De meisten Krüüzwege hebbt ja veiertaihn. De eine Station van dissen Krüüzweg ligg midden up einen Weg. Ein Krüüz. Fallste di bulde äöwer, wenn du dor langes geihst.

De Künstler, Egbert Verbeek is sien Naomen, de heff dat so wullt. Dat Krüüz, Lieden un Dood, so will he wiesen, sünd in use Leven nich wiet wäge. Ligget us in 'n Weg. Kanns manges nich eis ümto. So as wenn 't henleggt is, dat wi 't up use Schullern nähmet.

Up de Krüüzbalkens, dor bi den Staopelfelder Krüüzweg, dor ligg ein Mensk. Sien Lief is vull van Schrammen un Seehrs. Dat is einer, den man up 't Krüüz leggt heff, leip mitspält heff. Passeiert vandaoge uk aaltied weer.

Dat Krüüz ligg einen in'n Weg, liek vör de Fäute. Man in 'n Rüggen steiht ein Disk, ein'n gewaltigen ut Stein, ein Altaor. Mensken kaomt dor, so as an 'n Palmsönndag, mitanner tohoope. Deielt mitnanner Brot un Wien. Denkt doran: Wi hört tosaome. Un hei is midden unner us.

De, den 'se up 't Krüüz leggt hebbt, de deielt mit us sien Leven un uck usen Dood.
Kick man nu nao vörne, den Altaor in 'n Rüggen, över 't Krüüz weg, dann süht man 'ne Müürn ut Stein.

Liek inne Midde van de Müürn is ein Schlopp. Liek vör de Müürn, ein deip Lock. Dat Krüüz, de gewaltigen Steine, schwaor ligget 'se einen vör de Fäute, wenn man dor in 't Lock steiht. Man wenn man dor to de Middagstied steiht un einen de warmen Sünnenstraohlen draopet, dann kick man, so anstött, nao baoven un süht ein Schlopp inne Müürn. Dat Sünnenlecht fallt dör 't Schlopp un wieset den Weg.

In 't deipe Lock staohn, dat Lecht dör de Müürn einen intomeute faalen,
intomeute löchten seihn — dat is Ostern.
De Heven kummpt us intomeute. Kien Stein hollt 'n up.



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


19.8.2018


na baven