Dat kannst mi glööven!
Van Bloomen un Mensken

vun Alxander Rolfes


To'n Anhören hier klicken:


Lesen deit Alexander Rolfes.


De Sünne schinnt, wat se kann. Ehr Straohlen fallt liek hendaol up Botterbloomen, Klöver, Kiekdörntuun, roen Mohn, Jelänger-Jeleiver un de gälen Köppe van 't Johanniskruut. Botterväögels flittket van eine nao de annern Bloomen. Immen stuvet fliedig hen un her. Ick ligge rüggelings in 't Gress un tell de Wulkenschippe, de dor an 'n Häven seilt. Off un to straokt de Wind mi sacht över 't Gesicht un bring einen krüdigen Räöke mit.

Sommerdag. Sücke Sommersünnendaoge laotet mi de Welt rund üm mi to mit heil anner Oogen bekieken, mange sogor vergäten. Ik frai mi dann an aals, wat dor glömmt un blaiht. Un eine Bloomen is moijer antokieken as de annere. Wisse, se aale blaiht bloß för 'n kotte Tied, wecke bloß för eine Nacht. Man missen mag ik kiene.

So as ik hebbt de meisten Lüüe Bloomen geern. So 'n Struuk Rausen, mit Schleierkruut, off mit witte Margritten, laotet den Dag faoken anners utseihn. Ton Hochtiedsdag off ton Geburtsdag laotet Bloomen uk noch so griese Oogen straohlen.

Man wat is dat, wat us an de Bloomen so heller gefallt: de krüüdige Räöke, de moijen Klöörs. Off is 't uk dat, dat wi väle van dat, wat use Leven utmaoket, bi de Bloomen weerfind't: Wassen un greunen, blaihen, welken un weer vergaohn.

Un wenn wi us mit de ein' off annern Bloomen verglieken dauet, dann market wi uk, dat wi Mensken, jüst as de Bloomen, verschälen Klöers hebbt. Wecke van us bünd so as de Bloomen, de aale Johre weerkaomet, de man gaut kennt, wor man sik up verlaoten kann. Annere sünd manges as 'n Rausen — ein bäten wat stiekelig, fallt van wieden all up, man se käönt kiene Külde off ruugen Wind off.

Wecke bünd mietsaom, sett't sik dor dör, wor 't anners bloß gries un kaohl utseehg. Wecke find't man für sik allennig, so as de Orchideen, annere bloß in 'n Büld, so as de Botterbloomen. Un dann giv dat wecke, de laotet wunnersmoije, rückt aower nich. Annere sühst du erst van dicht bi, man van wieden hest all lange ehren feinen Räöke in de Näsen.

Man egaol, van kiene Bloomen wüdden wi seggen, de dögg nicks, de lätt nicks. Aale möget wi se geern, jede up ehre Oort un Wiese. Un eins is wisse. Wi aale tosaomen gävet ein besünners moijen Bloomenstruuk off, wor man sien Pläseier an hebben kann.


Fotos: A. Nissen, G. Everding

"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


26.11.2017


na baven