Dat kannst mi glööven!
Groote un lüttke Wünschke

vun Daniela Rippe

To'n Anhören hier klicken:

Lesen deit Daniela Rippe.

Annerlessens häbb ick morgens up'n Weg in't Büro in't Radio van'n Aktion hört, wor dei Lüe anroopen un van ehrn gröttsten Wunschk vertellen schullen. Un wenn man Glück har, dann erfüllde dei Sender den Wunschk.

Ick sägg jau, dat wörn aower deilwiese Wünschke: Einer wull mit ein'n Fallschirm ut 'n Heißluftballon springen, ein annern allennig maol eine Nacht in'n Zoo blieven. Eine Frau wull mit ehr Auto eine Skischanze rupfeuhern! Ganz schön verrückt!

In't Büro häbb ick dann glieks miene Kollegin fröggt, wat dann ehr gröttste Wunschk was. Sei överlä lange. Dann mennde sei: Einmaol einen ganzen Dag allennig in'n groot bekanntet Koophuus soväle as se wull, inkoopen dräöwen! Dat was doch wat! Man dat löt sick ja so drocke woll nich maol so äben ümmesetten. Un dann kick sei mi an un frögg: "Un wat is dien gröttste Wunschk?"

Ick överlä kott, un jao, dor geew et wat, wor ick all immer maol Lust up har: einmaol in eine einsaome Hütten inne Barge för ein poor Daoge waohnen. Aohne Strom, Handy, Fernsehen — mit frisk Waoter van 'ne Bäke vör de Dörn. Maol einfach Tied häbben, blots dei Natur tau geneiten. "Jao, un? Dann dau dat doch!", sägg miene Kollegin.

Aobends vertellde ick dat mienen Kerl bi'n Dischke. Un dat har ick nich dacht: Hei was heller begeistert un keek fort in't Internet nao. Duurde nich lange, don har hei uck all wat Passen funnen. Hei keek mi an un sä: "Dat maokt wi!" Einfach so! Gi käönt jau vörstellen, wo ick mi dor äöwer fraiet häbbe!

Jao, wecke Wünschke käönt drocke wohr weern. Man nich aale. Un wecke Lüe mäöt villicht ehr heile Läwen dorup wachten, bit dat ehr Wunschk wohr wedd. Miene Kollegin mott villicht ehr Läwen lang wieder dorvan drömen, maol allenig einen ganzen Dag intaukoopen. Aower et giff ein Bült Wünschke, dei laotet sick drocke ümmesetten. Un dat sünd meist dei, dei gor nich so groot sünd. Un faoken krieget wi dei schenket. Einfach so! Man mott manges blots maol van sienen Wunschk vertellen. Wat is jau gröötste Wunschk, leive Tauhörers? Vertellt dor eis maol van. Villicht wedd dei dann uk wohr. So as miene!