Dat kannst mi glööven!
"Wullt du dat behollen oder kann dat weg?"

vun Daniela Rippe


To'n Anhören hier klicken:


Lesen deit Daniela Rippe.



Also echt, Opa!

Miene Mammen un ick häbbt annerleßtens den Dackbbäön uprümet. Wat sick dor so nao teihn Johre aale so ansammelt häff, dat kann einer bold nich glöven. Man wunnert sick äöwer: Kinnerbäuker, Dischkdäkens von Oma, dei up kienen Dischk jüst mehr passet. Dor finnt sick Dekoration för dei Wiehnachtstied un Ostertied, worvan man gor nich wüssde, dat man sick maol sowat anschaffet häff. Un wi häbbt uck noch so 'ne Figur ut Holt funnen, wat Opa maol sülfws moaket häff: ein Kerlken ut Holt.

Un nu häff Mammen 'ne olle Kannen inne Hand. "Wullt du dat behollen of kann dat weg?", fraoget sei.

Dei Kannen häbb ick moal van mienen Unkel Alfons krägen, as ick in't Studium goahn bün. Bruuken kann ick dei jüst nich, aower wegschmieten? Ick weit nich. Ick pack dei Kannen in einen Karton mit väl anner Tügs, wat ick behollen will. "Wegschmieten", denk ick, "wegschmieten kanns dat blots einmaol!"

Mien Huus steiht vull mit luuter Saoken, dei ick oder mien Leiwsten maol van irgendein'n krägen häbbt off van irgenwo her mitbröcht häbbt. Luuter Erinnerungen, wor blots wi wat mit anfangen käönt. Manges sünd dat uck lüttke of groote Geschenke van Lüe, dei dor all lange gor nich mehr sünd. Man disse Dinge, dei erinnert us an disse Lüe. Se wieset, dat dei us uck vandaoge noch wichtig sünd. So blievet sei uck ein Stücksken lebennig unner us.

Kann wäsen, villicht stell ick dei Kannen van Unkel Alfons maol wer up. Kann uck wäsen, villicht packet miene Kinner irgendwann den Karton maol weer ut un mäöget dei Kannen lien. Un villicht denk ick dann uck noch einmoal weer an Unkel Alfons, wenn ick dei Kannen dor bi miene Kinner wor seih.

Manges denk ick, dei Lüe schmietet tau gawe tau väle weg. So wedd uck tau gawe dei Geschichten vergäten, dei mit disse Saoken verbunnen sünd. Geschichten van Lüe, dei för us wichtig wäsen sünd.

Un wenn gi dat nächste Moal schiens wat nich mehr bruuken käönt, dann äöwerlegget eis doch noch maoll, wat för Geschichten dat Deil vertellt.


Översicht över de Reeg
"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


4.6.2017


na baven