Passion 2015:
Sünndag Lätare

vun Rudi Witzke


Dat Hungerdauk orrer Passioonsdauk verdeckt in de Fastentiet in de kathoolsche Kark allens, wat Jesus as Bild orrer Skulptur zeigt. Dat küümt vun den jüüdschen Tempelvörhang, vun den in dat Niege Testament in'n Tosamenhang mit den Doot an't Krüüz vun Jesu mihrfach bericht ward. Diss Dauk trennt de Gemeind optisch vun den Aktaarruum. De Gemeind is bloots Verlööf geven, de Liturgie bloots to hören un nix to seihn. To de to'n Körper drapen Buß kümmt noch en seelisch Buß. De Sinnsprook "an't Hungerdauk nagen" meint nich bloots de materieellen Göder, sünner ok de as benaut wirken Fern vun Gott.

Middewiel leven wi upklärt Minschen in en säkular Gesellschop, wo en spirituell Lengen bloots noch kuum to seihn un to spören is. Fröher sää man, dat is "as in en Märken"; späder denn "as in en Film", wenn wat utermaten passeerte. Hüüt kann een alles verkloren mit en digitaal Methood. Un mit Nano un so. Denkt de Säkularen. Welk vertellen dat ok as en Witz, de wíedervertellt ward. De Wetenschop un besünners de Natuurwetenschopen warden för den besten Weg hollen, künnig to warden. De Wetenschopen maken dat Leven dörch ehr Erfinnungen lichter. Se erfinnen aver ok jümmer Nieges, sik in Kriege un bi Attentate ümtobringen. Dat vergeiht kuum een Dag, wo in de Narichten in't Kiekschapp nich vun ümbröchte Kinner, Fruuns un ole Lüüd bericht ward.

Ward de Gloven dorgegen to minn acht? Dor heit dat: Du schallst nich doot maken. Vun wo laten sik hüüt un in de Taukunft de Sinn vun't Leven un de Werte afledden? Dat is woll nöödig, Gloven un Weten richtig to ünnerscheiden un een Vermengeleern to ünnerlaten.

In Jesaja 66 steiht schreven, wat uns de Bibel för dissen Dag mitgifft:

"Ik will juuch tüüschen, as en Mudder ehr Kind tüüscht,
ji schallt juuch Freud an Jerusalem hebbn."



Wi, de Redakschoon vun Plattpartu, Marlou Lessing un Rudi Witzke,
dankt för de Verlööf MVG Aachen, dat Bild vun dat Hungerdauk hier to nütten.

15.3.2015
 

 


na baven