Dei Osterkessen

van Ludgerd Lüske

Dei Osterkessen äöwernimmp den Heidenbruuk van dat Opferfüer, aower mit ein anneret Bedüen. Dei Osterkessen un dat Osterfüer staoht för dat neie Läben, wobi dat Opferfüer för dei Heidengötter eine Fraide wän schull. Dat Osterfüer, an dat man alltied dei Osterkessen ansticken dait, giff et noch in väle Dörpen.

Osterkessen — Lumen Christi! — Dat Lecht Christi!

Lumen Christi! In dei Osternacht stickt man dei Osterkessen fierlick an. Dei Kessen schall nich för dat Verbrennen staohn, sünners för dat Lecht Christi an dei Osterdaoge.

Anfang un End — Alpha un Omega

Christus gistern un vandaoge- Anfang un End — Alpha un Omega. Dat sünd dorför dei dei Teiken. Üm hört dei Tied un dei Äwigkeit, hei hätt dei Macht un dei Herrlich-keit. So bäet man dorbi.

Alpha un Omega: "Ick bün dat Alpha un dat Omega, dei Eierste un dei Leßte, dei Anfang un dat End." Dat sägg Jesus äöwer sick sülwes in Johannes sien Vörutsäggen (Offb 22,13 EU). Un uck Gott sägg: "Ick bün dat Alpha un dat Omega, sägg Gott, dei Herr, dei is un dei was un dei kummp, dei Herrschker äöwer dei heele Welt." (Offb 1,8 EU). Dei eierste un dei leßte Bauckstaobe van dat griechischke Alphabet staoht för Gott un Christus as den Maoker un Meister, dei dat Läben van dei heele Welt van den Anfang bit nao dat End ümfaoten dait.

Das Kreuz — "dat" Teiken van dat Christentum

Dat Krüz is "dat" Teiken van dat Christentum. Et giff us ein Besinnen an Jesus sien freiwilliget Starwen an't Krüz, womit hei dei Sünnen van dei Welt up sick nöhm, un an dat Haopen up ein Wedderupstaohn un ein äwiget Läben. Dat Krüz is so nich blots ein Teiken för den Dood, sünners uck van ein Haopen un Erlösen. Dei beiden Krüzbalkens wiest baobenschkoop dat Tausaomeknüppen van Gott mit den Menschk.

Johrtaohl — dat Karkenjohr

Dat Karkenjohr bestaiht ut dei Festkrings, eiers üm Ostern, denn üm Wiehnachten. In dei Christenheitgeschichte wörd dorut mit dei Tied ein Kring äöwer dat heele Johr weg. Affloop un Wark stimmt in dei Ost- un Westkarkens gröttsdendeils äöwerein. Dei wichtigsten Festdaoten van dei orthodoxen Karkens ligget aower anners as bi dei katholschken un evangelschken Karkens. Dei Festdaoge kriegt dorbi ehre eigen Liturgiefarwen.