Dat kannst mi glööven!
Bliev du sülms

vun Roswitha Osterbrink


To'n Anhören hier klicken:
Lesen deit Roswitha Osterbrink.


Kennt Ji WhatsApp? Bi WhatsApp kann man sück gegensietig mit sien Handy Texte off Belder hen un herschicken. Ick maok dat uck. Dat is 'ne feine Saoke. Man kann mit ein kotte Naoricht Termine afspräken off ein Bekannten, dei wiet wäge is, taun Geburtsdag gratleiern. Wisse, manges wunnert man sick, wat dei Lüüe dor so aale hen- un herschicket.

Aober annerlestens kreeg ick ein lüttket Beld taustüürt, wor up stünd: "Bliev wisseweg du sülms. Aober wenn Du Pippi Langstrump wän kannst, dann weer Pippi Langstrump."

Dor mösste ick tauerste 'n bittken wat schmüstern. Pippi Langstrump wän. Dat is ein lustigen Gedanken. Aober dann hebb ick dor 'n bäten över naodacht.


Pippilotta Viktualia Rollgardina Schokominza Efraimstochter Langstrump
up den Balkon van dei Villa Kunterbunt

Ick glöve, jederein weit, wecker Pippi Langstrump is. Astrid Lindgren heff dei Geschichte domaols för Kinner upschräven. Aober uck groote Lüüe hebbet dor ehrn Spaoß an. Bi Pippi Langstrump denket man fortsen an dat Wicht mit dat roe Haor, mit Schauhe, dei väl tau groot sünd, un Strümpe, dei nich bin'anner hört. Sei waohnt allennig in ein buntet Huus.
Worüm schullde man so wän at sei?

Ick hebb dat Bauk dann maol wedder ut't Regaol holt un 'n bittken wat in ümtauläsen. Wisse, dat was wat, wenn man so at sei 'n Kuffer vull mit Geld upp'n Schrank staohn har, wor man blots ingriepen mott. Un wenn man so stark was, dat man alls wegdrägen kunnde, wat ein in 'n Wäge steiht. Man ick hebbe mi dann överleggt, dat dor noch mehr is. Pippi Langstrump is ein Menske, dei kick nich, off ehr Mitmensken Junges off Wichter, arm off riek, schwatt off witt sünd. Sei geiht up jederein fröndlick tau.


Oder wäs sei: Astrid Lindgren

Ehr is dat uck egaol, wat dei anneren Lüe över ehr denket. Sei is mit sück sümmes taufräe. Un dat is för mi wat ganz Besünners: Mit sück sümmes taufräe wän. Nich verseuken, so tau wän, at annere ein'n hebben wüllt. Nich wisseweg dat maoken, wat annere daut. Genawe dat Tüüch antrecken, wat sei alle anhebbet. Dat glieke Auto föhrn at dei Naober. Wisse, dat is nich immer ganz licht. Aober wenn man dat kann, kann man uck lichter up annere taugaohn, weil man sick nich alltied mit annere mäten un verglieken mott. Dann kann man siene Mitmensken uck van Harten anlachen un froh maoken. Dorför moot man nich eis maol dei süftige Spraoke prooten. Wenn ick ein Menske van Harten anlachen dau, versteiht hei mi uck aohne tau schnacken. Verseuk dat eis maol: Wäs maol aff un tau ein bäten at Pippi Langstrump!



"Dat kannst mi glööven!" is eine plattdütschke Andachtriege in't Radio (NDR),
dei siet den 1. Advent 1953 staodig in't Programm staiht.
Tau Tied schriewet hierför rund 75 evangelschke un katholschke Theologen
staodig Andachten up unnerscheidlicket Nedderdütschet un
Oostfäölschket Platt. Sendet werd maondaogs bit freidaogs
üm 14.20 Uhr van NDR 1 Neddersassen.

Bi us up plattpartu.de finnt man nu utsöchte Bidräge van disse Radiosendung.


30.9.2018


na baven