Wi in uns Hamborg

van Heinz Tiekötter

Een Frömden, de no Hamborg kummt,
versteiht keen Wort, is glieks verstummt,
wenn he hier Minschen plattdüütsch snacken heurt.
He kriggt nix mit, wat em gewaltig steurt.
Kummt he vun Süden ran,
denkt he bi sik: Mien lebe Mann,
wat is dat doch 'n wunnerboren Blick
hier vun de Veddel vör de Brück.

De Brück an'n Avend is 'ne Schau. Nich so pläseerlich is de Stau.

Sien Blick verännert sik denn nich so gau,
he steiht hier meist 'n Stünn in'n Stau.
Radfohrers peest an em vörbi un winkt.
He täuvt un täuvt, obschoons dat fix no Diesel stinkt.
Vun hier bit in de Stadt sünd grod veer Kilometer,
de geiht man in'ne knappe Stünn.
Sitt een in'n Auto, kümmt he später,
nimm man den Bus, dat mookt mehr Sinn.
Plietscher ward he bi de neegste Reis
denn kummt he mit de Iesenbohn.
Twee Stünnen steiht de Toch all op dat Gleis;
de Lokfeuhrers streikt grod för mehr Lohn.
Un langt he enddlich op uns Bohnhoff an,
mookt so'n Barg Minschen em benaut.
He ward anrempelt vun Kinner, Froon un Mann,
He mutt op siene Soken achten, sünst ward he noch beklaut.

Mien Rotslag is, he kümmt beter mit'n Boot
denn liggt he kommood in unsen City-Hoben.
Nu schafft he allens licht tofoot.
Denn ward he Hamborg düchtig loben.

An'n Jungferstieg un Ballindamm
dor haut em glieks de Bettlers an.
Doch in de Koophüüs in de Mönckestroot
find he so manchet Angebott.
Hett he nu all de Lodens satt,
denn geiht he dörch de Spiekerstadt.
De heet nu Hoben-City. Dat weer Voscheraus Idee.
Büros un Kneipen stoht hier dicht an'n Quay.

Vürn, op de ool Kehrwiederspitz,
dor steiht Ole Beust sien Glaspalast.
De Millijarde weer för Hamborg bloots 'n Witz!
Hier hett de Elphi nu ehrn fasten Platz.
Hier giff't Musik vun Rock bit Klassik
un Intritt kost dat ok noch massig,
denn de Muskanten ut de hele Welt
de speelt hier op un kriegt veel Geld.
Betolt ward dat jo meist vun'n lütten Mann.
Vun em koomt doch de mehrsten Stüern.
An Koorten kummt he süllmst nich ran.
De sind meist vörbestellt un em ok veel to düer.
So blifft he buten or kümmt swoor rin.
Dat is ok Recht un hett sien Sinn.
Wat so'n Minsch all vun Musik ok kennt,
he leest nich veel, speelt sülmst keen Instrument!

Jo, högen mach he sik annerswo,
för em is düsse Tempel veel to düer.
Amüsement gifft ok in'n Radio.
Blots för den Johres-Ünnerschuss
dor wüllt se wedder siene Stüer.

So is dat allerwegens op de Welt
un jümmers ut de sülben Grünn.
Üm vörnan to stohn, dor bruukst du Geld.
De wat op de Noht hett, de steiht ok in de Sünn.