"Frühe Kundenbindung"?

vun Meike Balzer-Fraun

Endlich Wiehnachtsmarkt! Ok in Bremen is't nu wedder so wiet. Nich blots för uns en ‚Mutt' is de Besöök bi de lütte Bood dicht an'n Doom, wo al johrenlang en Frue Kantüffelpuffers backt. Kross, hitt, allerbest!

Bi't Töven in de lange Slang, Tokieken, wo dat bruddelt, un den leckern Duft anne frische Luft löppt di al Water in'n Mund tosamen. Dorto Appelmoos un nu ok so'n niemoodschen Kraam, deftig as ‚Sour Cream' un ‚Tsatsiki' oder sööt as Nutella. Wat so'n echten Bremer is, de bruukt allerdings blots Appelmoos un 'n beten Zucker. Kannst, nee, muttst di all teihn Fingers na aflicken!

Vör allen middaags sünd de Kunnen hier meist öllere, faken ok richtig ole Lüüd. Is even en Traditschoonseten, wat een tohuus so goot nich so licht henkriggt. Un du hest den Röök nich inne Köök!

Jaaa, da lohnt sik de Töövslang! Bild Meike Balzer-Fraun

Vörmiddaags is de Wiehnachtsmarkt nu ok vull vun Schölers ‚op Tour'. Ehr Schoolmeesters hefft Tiet för letzte Inkööp oder sitt wiet achtern in een vun de groten Punschtelten, snackt un hööpt, dat de Kinner keen Dummtüüch nich maakt un dat se all to rechter Tiet wedder an'n Bus sünd.
Dat is keen Nahsnack nich — ik heff dat sülven faken jüst so beleevt.

Dree Jungs, woll Grundschölers, bestellt Puffers — mit Appelmoos un Nutella.
Na 'n beten Sökeree findt sik ok en Glas in't Köhlschapp, man mit ieskohlt Nutella kannst nich veel anfangen.

Wat nu? "Deit mi leed, hefft wi jüst nich!" oder "Mööt ji later mal wedderkamen!" ?
Nee, nix dor! Töövslang hen, Töövslang her, en Mitarbeider kriggt dat Regeer över de grote Fettpann un de Chefin suust mit en Papptöller dwars över'n Doomshoff na en Crèpes-Stand hen.

Mit en groten Klacks Nutella kriggt de Jungs nu ehr dree Puffers. In en lütt Pappkump gifft't noch dat Appelmoos. Dree Poor hell strahlen Kinnerogen.

Weer dat nu blots anwennt "frühe Kundenbindung"?

För mi seeg dat mehr ut as de schiere Wiehnachtfründlichkeit.