Fief Wihnachtsleeder ut fief Länner
Petit Papa Noël

vun Behrend Böckmann

So as uns Kinner up'n Wihnachtsmann täuwen, luern dei Kinner in Russland up "Vadding Frost — Väterchen Frost", in Frankriek up den "Wihnachtspapa — Papa Noël" un inne Staaten up den "Santa Claus". Un so as dat lütt Jesuskind eins dei himmlisch Gåw von Gott-Vadder för dei Minschheit wier un sien Geburt inne Hillig Nacht tau Bethlehem fieert wür, bringen Wihnachtsmann, Vadding Frost, Papa Noël, Santa Claus un woans disse Gåwenbringer süss noch heiten, för orrige Kinner lütte un grote Gåwen — von'n Griffelkasten bet tau'n "Playstäischen".

Un œwer dei Geburt von't Jesuskind un dat Verdeilen von Gåwen wür dat Wihnachtsfest un dorvon in olle un niege Leeder ümmer wedder sungen. Un männig Leed hett den Leedermåker Anseihn orrer Vermœgen inbröcht.

As 1946 dei Franzos' R. Pottier sienen Film "Destins" dreiht un em dei vörseihn Gospelchor ut Amerika utföllt, möst 'n Sänger för dat vörseihn Leed von Raymond Vinci (Text) un Henry Martinet (Melodie) funnen warden. Man is up den sihr bekannten Sänger un Theoterspäler Tino Rossi (1907-1983) taugåhn. Hei hett in sien Läben dusend Leeder up 50 Platten upnåhmen un 250 Milljonen dorvon verköfft. In 25 Kinofilms hett hei ok mitspält. Kein Wunner, dat hei anne Stell' von den Gospelchor nu dat Leed "Petit Papa Noël" singen süll. Un dat schlöcht dörch. Dit Leed is alle Johr wedder dei "Hit" in Frankriek un inne "Wihnachtscharts" in anner Länner. Von dei Upnahm mit Tino Rossi würn bet hüt so anne 60 Milljonen Platten verköfft, hentaukåmen dei mit anner Sängers as Mireille Mathieu, Dalida, Boney M., Nicole, Nana Mouskouri, Roberto Blanco, Rolf Zuckowski, Claudia Jung un väle anner.

"Petit Papa Noël" is in väle anner Språken oewersett't worden, up hochdüütsch heit dat denn: "Wann kommst du, Weihnachtsmann". Sungen ward von ein lütt Kind, dat up'e Knei licht un den Papa Noël bäden deit, em nich tau vergäten un em dat bestellte Spältüüch dörch den Schostein in sien Schauh vör den Åben tau leggen. Un hei gifft den Papa Noël noch por Henwies, sik för dei Reis warm antautrecken un sien Kiep all uttaupacken, wenn dei Kinner noch schlåpen. Un ümmer wedder heit dat: "Leiwer Papa Noël, wenn du von'n Häben rünnerkümmst mit oewerdusende Spältüüch, denn vergät nich mienen lütten Schauh".

Bi't Singen von "Petit Papa Noël" lüchten väle, väle Kinnerogen — un in den lütten Schauh von dei Leedermåker hett dei leiw Papa Noël mit dei Johren 'n gaut Vermögen lecht.