Wihnachten digital

vun Behrend Böckmann

Dei Herr, dei deit in'n Häben läben
un up Wulken glücklich schwäben.

Hei wull vör Tieden all beläben,
dat dat künn n' Wunner gäben;
Dunn hürt hei wat von digitål
un geef sien Engels dit Signål:
Petrus däd 'nen Kurs inrichten
för dei biblischen Geschichten,
dei man denn up dei Ierdenwelt
von nu an digitål vertellt.
'n Smaartfoon*, Modell Häben —
ünnen un båben sall't dat gäben —
gifft hei anne Engels ut
un fix hemm' dei den Bågen rut,
åhn in'n Häben sik tau quälen
ünnen Schäpers antaumählen**.

Dei Schaap sünd niedsch; sei kriegt anstä
ein Mähl man jümmer bloots ein Mäh!

Doch ihrer dat is so passiert,
hemm' dei Schäpers sik verfihrt:
So as 'n Stiern an'n Häben lücht,
'n Smaartfoon tau dei Schäpers flücht,
up dei Engels daun verkünnen,
dat 'n bald dat Kind ward finnen,
dei Öllern mit den Gottessœhn
in'n Ossenkrüff up kollen Bœn.

Un't Displäh*** wiest dei Schäpers an,
woans den Wech man finnen kann
un mit "Geokesching" **** denn
geiht dat af nå Bethlehem.
Mit Hülp von't Smaartfoon Knall up Fall
heit dat Halt: hier is dei Stall,
sei seihn dei Öllern bannig froh
un dat schlåpend Kind up Stroh.

As man nich nauch wunnern kann,
kåmen ok noch anner an...
un ok dei Drei ut't Morgenland
harrn 'n Smaartfoon inne Hand,
dörch dei Wiesung digitål
güngen's noch dei Stråt hendål,
hemm' den lütten "König" funnen,
den Maria harr entbunnen.

As sei mit't Kind 'n Selfie måken
un œwergäben fiene Såken,
tuschiern's up't Displäh mit'n Mål
dat Teiken för'n Musikkanål,
un Gott sien Fründ, dei hillig Theo,
singt "Gloria in Excelsis Deo".
Dorbi kümmt dat Kind tau Rauh,
ok Josef kricht dei Ogen tau,
un as denn dei Gesang tau Enn,
höll hei 'n Smaartfoon in sien Hänn.

Vör Freud, so däd't in'n Düstern schienen,
füng dat Kind nu an tau grienen,
wüsst nich, wat passieren künn,
wat Herodes harr in'n Sinn:
nå em süll't in'n römisch Läben
keinen "Judenkönig" gäben,
un hei verkünnt mit Freuden grot:
"Måkt den Judenkönig dod!"
Doch Herodes, disse Depp,
harr kein Smaartfoon un kein Epp*****,
un as hei wull denn Jesus fåten,
harr dei Bethlehem verlåten.

Denn Josef harr von Engels hürt,
dat dei Jung Herodes stürt,
dat Gott-Vadder sik wier wiss,
dat Bethlehem nich säker is,
un so wür em dat denn düchten,
sei süllen leiwers wiet wech flüchten.

In't Uhr dat helpend Gotteswurt,
treckt furtsens dei Fomilie furt,
af güng dat in ein frömdet Land
mit den Äsel dörch Wüstensand;
gaut güng't mit GPS vöran
un keem so in Ägypten an,
is in't Land an'n Nil denn bläben,
bet Herodes güng ut't Läben.

Mit Engelshülp däd man erkunnen,
woans wür dei Rückwech funnen,
un up't Display wiest KI an,
wat man as wohr annähmen kann:
Dei Ankunft ut Ägypten wier
an'n sœbten Hartung****** in't Johr vier.

Sacht is dei Christenheit entståhn
un denn uteinanner gåhn,
dei einen hemm' taun Fründ in Rom
den Papst in'n groten Peitersdom,
un hollen för dat Allerbest
dei Geburt as Wihnachtsfest.
In Konstantinopel för den Osten
höllt 'n Patriarch den Posten,
wo sik sünd sien Christen wiss,
dat dei Dach dei Festdach is,
an den dei Flucht ehr Enn' denn nähm,
dat Kind nå Nazareth trüchkeem,
un dat dat Volk sihr glücklich wier
an'n sœbten Hartung in't Johr vier.

Mien Drom ut dei Vergangenheit
ward mit einstens Würklichkeit,
denn inne Kark taun iersten Mål
gifft't Krübbenspäl nu digitål.
Vör't Altorbild, Herr Jemineh!,
'n grote Bildwand as Displäh,
up dei dei Taukiekers beläben,
wat sik vör Johren harr begäben.
Un dor dei Taulop bannig dull,
wier dei Kark denn bräkendvull:
pablick wjuing****** inne Hillig Nacht!
Wecker harr sik dat wull dacht?

* Smartphone
** mailen
*** Display
**** Geocaching
***** App
****** Januar
******* public viewing