 |
Alle söben Johr ännert sik de Welt — un ok de Mensch Mit söben geiht dat no School. Ik bün düt Johr nu bi den — woveelten? — Wessel. Woveel, dat segg ik nich.
Verännern, dat geiht ok in de Technik. Mit KI warrt Dode wedder labennig. Toeerst is mi dat gor nich so opfullen mit de Technik. Dütt un dat geiht mol inne Grütt. Na ja, seggst du. — Bi uns is dat im Momang dull. Un dor fangt wi an to tellen. Akku vun’t Fohrrad = 7 Johr olt Na good, wenn wat twei geiht, mutt eben wat Nieget her. Also rin den Loden un mit den Verkäuper snacken. — Snacken? Wat is dat denn? "Vielen Dank für Ihren Besuch. Besuchen Sie uns gern auf der Seite www….." Un denn klickst di dörch. Af un an gifft dat enen Verklorer an de rechte Siet. Ober so richtig hölpen köönt de ok nich. Wi mööt blind bestellen un köönt dat nich richtig ankieken orrer anfoten. Ik find dat gräsig. Bi mienen Fohrrad-Akku hebbt wi würklich enen Loden funnen mit labennige Minschen. Fründlich, harr Ohnung un de Akku weer ratz, fatz dor. Bi de Waschmaschien geev dat enen Kunnendeenst, sogor mit Telefonnummer. Un dat hett allens wunnerbor klappt.
Ober nu: mien Computer: Ik mutt jo nu Windows 11 hebben, seggt se. — Keen Problem, seggt en Fründ, ik help di dorbi. — De arme Kerl! Ik heff nu al en schlecht Geweten. Tja, un nu hebbt wi den Salot. Allens dörchenanner. Outlook geiht blots noch an’n Vörmiddag. Un Internet is blots Stufe rot. Ik kann wunnerbor an’n Sünndag Vörmiddag mit de Kist arbeiden. Also eenmol in de Week??? Dat is doch keen Tostand. Also: Herzschrittmaker för mienen Computer. Orrer enen Niegen. In 7 Johr kümmt denn wedder Alarm. Ober denn leev ik villicht gor nich mehr.
27.5.2025 |
vun 
