Bi den Doktor inne Wachtkaamer

vun Günter Weber


Blaut hett de Doktor mi afnohmen. Nu will hei mi vertellen, woans de Weerten sünd. Nee, hei sitt nich dor, op mi tau wachten. Dor sünd ok noch anner Lüü, un wi all sitt inne Wachtkaamer. Ik höögte mi vun Mergen all ein. Wier ich doch alleen dor in de Stuuv. Nich lang! Ik hüürte dat al vun de Deerns an den Empfang. Twee so opkladeeschte Damen kemen in dat Wartezimmer. De een so ganz in Swatt antüdert. Mit sone Stola üm. De Snavel stunn nich still. De anner wier doch so'n beeten normal. Mal afsehn vun de Tehn- un Fingernagels. De wiern in Blau farvt.

Beide setten sik daal un de een nehm so'n Zeitung. De Doktor is so'n Tierliebhaber. So sünd ok de Zeitungen, de dor liggt. De „Bemaalte“ snapp sik en Zeitung mit Hunnen. De anner haalt ut den Büdel Knütt-Tüüg un füng an tau knütten. Vun mienen Platz ut kunn ik nich sehn, bi wat för eenen Hund sei inne Zeitung wier. Aver denn:

"Kiek mol, kiek mol", seggt sei tau de ganz in Swatt, "de süht ut as dienen Flori!"
De anner keek so'n bäten bilöpig op dat Bild un meente denn, „Mein Flori ist aber doch gepflegter!“

Nu harrn beid en Thema. Lang un breed vertell de Swatte, wat sei den Flori allens Godes deit. Vun‘t Fauder bet schloapen wier allens dorbi. Bi dat Vertellen vun den Hund sien Slaperie heff ik mi aver einen höögt. Dor seggt de blau Anmaalte tau de ganz in Swatt: "Dein Flori schläft doch auch immer bei dir im Bett?"
"In't Bett woll", seggt de Swatte. "Aver man bloots an’t Footenn. Hei is bang. Ik snork doch so luut. Annerletzt hett hei mi sogor anknurrt", vertellte die Swatte. "Ja, middags heff ik op de Kautsch lägen. Flori mit sienen Kopp op mienen Buuk. Dor hett mi de Maag knurrt. Flori suust as anstoken vun de Kautsch un hett mienen Buuk trüch knurrt!"

De Doktor hett sik wiss fraagt, wat grinst de denn so?, as ik em vertell, de Nierenwerte sünd ganz stabil.

Ik heff noch lacht, as ik een veerdel Stunn laater tau Hus ankamen bün. Mien Ex-Verlöövte vun vör 60 Joahr hett tauierst meint, ik wier bi'n Nervenarzt west. — Dorbi wier ik bi den Urologen.


28.8.2019


na baven