Veel
Glück
vun Heinz Tiekötter
Wat löppt doch männichmol de Lüüd
griesmulig dörch de Welt! Du hest keen Schangs, se 'n beten wat
optomuntern. Dat heet, wenn du dat so as Unkel Willy mookst, denn
gifft dat villicht doch 'n Weg. De mehrsten Minschen sünd n'
beten övergläuvsch
un no mehr Geld un Glück streevt se all. Un dor sett Unkel Willi
siene nee Methode an.
Anfungen hett de Geschicht dormit, dat he in de rechte
Büxentasch vun siene greune Cordbüx 'n Lock harr un em dordörch
'n Centstück rutrutscht is. Unkel Willi hett dat kleutern heurt,
sik gau bückt un dat wedder ophoben. Wat för'n
Glück, dat he noch so goot heurn kunn, hett he bi sik dacht.
Unkel Willi nehm den Cent in de Hann, keek dat utduernd an, un een
Gedanken scheet em dörch'n Kopp: Wenn nu en annern Minschen den
Cent funnen harr, denn harr de mehrsten Lüüd dor op dreemol
speet un "Toi Toi Toi!" seggt. Un vele wurrn em as Glückspenn
in de Schuuv packen. Un se harr'n sik freit. Villicht
harrn se sik sogor vörnohmen, an Sünndag mol Lotto to speelen,
denn
dat eerste Glückteken weer jo nu all indropen. Un dat griesmulige
Gesicht harrn se eerstmol afleggt.
Bi'n Freuhstück säe Unkel Willi to Tante Hermine,
dat he 'n Lock in de rechte Büxentasch harr. Man se sull dat
nich toneihn, he bruukt dat noch. He mutt dormit noch 'n poor Minschen
glücklich moken. Tante verstunn keen Woort, man se harr sik mit
de Tiet an Unkel Willis sien kruse Gedankenwelt geweuhnt un lett em
dat Lock in de Tasch. Unkel Willi hett sik vun de Spoorkass hunnert
Centstücken
hoolt un un lett nu af un an mol een dorvun dörch dat rechte
Büxenbeen op dat Strotenploster rutschen. He beschenkt de Lüüd
mit'n beten Glück.
Fix
argern kann Unkel Willi sik, wenn 'n Minschen den Cent sütt un
nich opnümmt; wenn he mit'n Foot dor anstött un denn to
fuul is, sik to bücken. Ober dorför hett Unkel Will nu ok
'n sien Dreih: Bi solk Minschen öberhoolt he den Fuuljack, winkt
mit 'n Tein-Euroschien in de Hand un seggt denn in'n Vörbigohn:
"Dor achter hett wull 'n Minschen all sien
Geld verlorn." Denn, vertellt Unkel Willi, dreiht de mehrtsten
üm, lopen trüch un fangt dor an to seuken. Dat mookt ok
Spooß, seggt Unkel Willi.
4.1.2018
|