De Schachtel...
... de so utseeg as een Stern

Vertellsel vun Rita Kusch


Disse Schachtel hier, de moch us wat vertelln. Ick hebb er von een Fro kreegen, de ehr woller von een anner Fro hett, de se nich mehr hebben wull, se har sick so doröber argert, dat ehr rein schlech wurd, wenn se se noch länger in't Hus har.
Egentlich is dat doch ne feine Schachtel — kannst Bointjes indoon, een lüttjet Geschenk oder ok een Geldschien, wenn du een toveel hest un een kennen deist, de sick dorto freuen dee.

So hett dat ok de ole Tant Martha dacht. Se har de Schachtel nämlich toerst. Tant Martha weer een Fro, de so'n beten wat Besünners weer. Mit all, wat se dee, geev se de Lü wat to'n Denken. Wenn se di seggen wull, du kunnst ok woll mol woller dien Hus reinmoken, schenkte sie di en Buddel Ata. Wenn se di bipuhlen wull, du schust man mol din Kerl beter behandeln, het se di een neet Rezept upschreeben, un wull se di mit up den Weg geben, du schust man mol beten netter wen, nich so bitzig, denn het se di Weckspöler schunken.

Mit een von ehr Nichten har se besünners to doon. Disse Nichte, dat wer di een. To'n Arbeiten har se kien Lust, to'n Eten koken ok nich, to'n Reinmoken nich, blots mit'n Auto dör de Gegend förn un Koffi drinken un sick Filme in't Kino oder up Video ankieken. Am leevsten weer se sülben en Sternchen in Hollywood wurden. Se har meisttiets ehr Hoor in'n Kopp, ehr Figur un eere Fingernogels.

Dor fote Tant Martha een Entschluss. Se neem disse Schachtel, packte dor 1000 Euro in un denn keem dor boben up een Stoffdock. De Ecken von dat Stoffdock het se so'n beten faststoppt, dormit man de Schien nich fors finnen kunn. Denn het se de Nichte de Sternschachtel geben. De hett furs dacht, dat weer Geld vor een Mercedes, von wegen den Stern, un het sick duchtig freut. Un wenn nich dat Auto, so doch villicht een Reis no Hollywood oder een Jahreskort fört Kino. Könt ji jo vorstellen, wo se keeken het, at se dat Stoffdock seeg? Genau, so, at wenn dor Spinnen oder Müs in ween wern.
Mit so'n surt Gesicht het se sick man rech un schlecht bedankt bi Tant Martha. Un denn is se gau woller abtogen. De Sternschachtel het se int Auto schmeten un sick den ganzen Wech lang argert.

Bi eere Fründin, de se denn besöken de, um eer von de gräsige Tant Martha to vertellen un eer de noch veel gräsigere Schachtel to wisen, dor weer just Fatima an't Reinmoken. De Fründin von us Nichte weer ok nich so fix mit de Arbeit, har obers genog Geld, sick een Putzfro to holen. De beiden hebbt denn erst mol Koffi drunken un över Wihnachten schnackt. Wat se sick allens wünschen deen, wat dat kosten dee un wo se dat anstellen kunn, bit ant Fest genog Geld tohoptokratzen. Över de Wihachtsfilme hebbt se sick wat vertellt, över den Schmuck und de Diamanten von de riken Lü. Schmöken deen se ok dorbi. Fatima wer in de Twünschentiet mit dat Reinmoken fertig un wull no Hus gon. De Sternschachtel leeg noch ümmer upn Disch, at se Tschüß seggen de. Un um sick nich mehr länger an de Schachtel ut den Stern to argern, het us Nichte Fatima de Schachtel schunken. Fatima mokte de Schachtel open un freude sick über dat moie Dock. Dor har se int Fernsehn von hört, dat mokte binoh von allein rein. Se bedankte sick und gung los. Se kunn so'n Dock god bruken.

 

De beiden Fründinnen schnakten un schmökten noch een ganze Wil. Mitnmol bimmelte dat Handy von de Nichte un ant anner Enn weer Tant Martha. Of se dat Stoffdock al upprobeert har? Jo, ne, ick bin hier noch bi een Fründin. Aver veelen Dank nochmol — so knarrte se dör de Teen, so dat Tant Martha genau marken kunn, dat se sick duchtig argert har. Ober se markte ok, dat se de 1000 Euro unner dat Dok noch nich funnen har. Us Tant Martha hett nix seggt.

So keem dat erst dree Monat later rut, dat unner dat Dock disse moien Schien legen harrn. Dor har Fatima al längs neet Betttüchs för eer Kinner dorför kofft un nich mol use verdreihte Nichte het sick trot, dat woller tröchtofordern. Over se hett sick argert, för luter Arger hett se sick een Fingernogen afbeten un sick de Frisur tweiruschelt. Wat har se dor all för neet Tüch för köpen kunnt, oder wo veel Filme har se kieken kunnt. Wo veel Stunnen har se en Putzfro anstellen kunnt. Ne, disse dösige Tant Martha aber ok.

Aber Tant Marta hett dat woller mol schafft, de Lü wat to'n Leern för't Leben mit up den Weg to geben. De Nicht hett disse Schachtel un de Lehr dorin nich vergeten.
Also, wenn ji mol een komischet Geschenk kriegt, villicht nu bold to Wihnachten, kiekt eben erst richtig to, of dor nich noch wat unner sitt.



na baven