Keen is rieker?

vun Heinz Tiekötter

Annerlest stunn in een Illustrierte, dat de amerikonsche Schauspelersche Salma Hayek un ehr Mann Henri Pinault — he is Vörstand vun den groten Gucci-Konzeern — dat de beiden dat riekste Ehepoor in Hollywood sünd. Se hebbt tosomen 35 Milljarden Dollar.

Hollywood achter de Kulissen: holl un flach

Dat kann ik so nich stohn loten. Dwors hebbt se soveel Dollars, dat se de in düt Leben nich mehr utgeben köönt. Sünd se dormit riek? Nee, dat sünd se nich! Se sünd sekerlich wohlhabend; man nich riek.

To'n Bispeel mien Fründ Hannes is veel rieker. Wenn he vun de Schicht kümmt un sett sik mit'n Zigoor un Buddel Beer in sien Gorrn un kiekt de Wulken an Heben no, smitt de lütten Vagels een Handvull Körners hen un kiekt jem to un freit sik 'n Lock in'n .........!

Ok Herr Dompfaff is glücklich un tofreden

Wenn he sütt, wat siene Rabatten un de Blomen akkarat gedeiht, un sinniert, wat he noch planten kunn, denn ward he bestümmt nich mit so'n Modefuzzi tuuschen, de bloots 35 Milljarden hett. Hannes is in so'n Momang bestümmt rieker.

Dat heet, in de Tiet, wo ik dat hier opschriev, sünd dor in Hollywood bestümmt noch 'n poor Dusend Dollar tokomen. Na und, ward Hannes dinken.
Denn soveel Tofredenheit un Glück as Hannes in sien Gorrn hett, kann de in Hollywood sik gornich nich keupen; de arme Keerl.