Serotalin gifft Manneskraft

vun Behrend Böckmann

Verlött den Mann sien Manneskraft,
helpt em Himalayasaft,
den man inne Bargen kennt
un Shilajit, dat "Barch-Öl" nennt.

'N Wunnerdokter däd't erkunnen
un hett furtsens denn befunnen,
hei ward dat "Öl" analysiern
un an sik sülben utprobiern.

Hei kümmt dat Öl ok up dei Spur:
dit Produkt ut dei Natur
gifft Mannslüd dor dei nödig Kraft,
wat kein anner Middel schafft.

Dei Ünnersäukung hett ergäben,
dat Planten helpen tau beläben
dei Billung von dat Kierlshormon,
dat dor heit Testosteron.

In Ogenschien uns Dokter nimmt,
von wecker Planten dat wull kümmt,
dat Mannslüd hemm' so grotet Glück
mit ehr allerbestet Stück.

Von den Ginkgo sall dat kåmen,
ok vun'n Bockshornklee sien'n Såmen,
ok Maca un dei Burzeldorn
helpen up ehr Oort enorm.

Dei Burzeldorn (so'n putzig Nåm!)
helpt bi't Slappen-Steert-Syndrom!

Ginkgo dei för't Denken gaut
bringt in Wallung ok dat Blaut,
dat Mannslüd inne Adern stiggt,
bet sien Spältüch sik upricht.

Dei Macaplant wasst in Peru,
helpt 'n jökig Kierl in'n Nu,
un in männig anner Land
is Burzeldorn dei gaude Plant.

Wenn man disse Planten nimmt,
in dei Selen un Zink vörkümmt,
un kåkt dorut Naturkost-Pillen,
lött sik so männig Wunsch erfüllen.

Wat måkt den Schniedel wedder fit?
Pass up! Dei Hexen bruun dor mit!

Serotalin gifft Manneskraft
un as Superfud* dat schafft,
dat Leiweslust nimmt nie nich af,
dei Œdeldœdel nie nich schlaff.

Wecker Serotalin probiert,
ward as "Deckhingst" reklamiert,
måkt mit Barchöl sik 'n Nåmen,
von'n Wunnerdokter einst mitnåhmen.

Uns disse Wunnerdokter will,
dat jeder Kierl köfft nu sien Pill,
dei bi den öllsten Kierl dat schafft,
dat hei beläwt sien Manneskraft.

Methusalix güng nå'n Druiden
üm disse Pilln al vör lang Tieden!

Doch kein Kierl süll sik nich schämen,
jeden Dach twei intaunähmen,
denn twei Pillen Seratolin
sünd för'n Kierl dat Vitamin.

* Superfood