Potenzmiddel

vun Behrend Böckmann

Väle Kierls sünd sihr schenant
un frågen ünner vörholl'n Hand
wecker wull 'n Middel weit,
dormit dat wedder bäder geiht
un man as gauder Ehemann
sorgenfrie bikrupen kann.
In'n Kopp ganz klor un ünnen olt,
dat lött männig Kierl nich kolt…
Doch ihrer hei taun Dokter geiht,
hei ut'n Supplemang doch weit,
dat dat väle Middel gifft,
dei dei Lust up Leif andrifft.

Is œwer 40 Johr dei Mann,
wull jeder föfte nich mihr kann;
sünd's œwer sössdig, köfft 'n Drüddel
so neumt' "Nahrungsergänzungsmiddel",
dei kann man sik in't Nett bestellen
un möt nix dorvon vertellen.

Liekers möt 'n sik dull quälen,
dat richtig Middel uttauwählen:
Neradin, Seratolin
orrer leiwers Erectonin?
Ok anner Pillen würn utprobiert,
dei inne "Bunten" reklamiert,
von wecker sall väl Lust upkåmen,
wenn's dachdääglich denn innåhmen:
Schluck drei Pillen Dach för Dach,
ok wenn man Pill'n nich schlucken mach,
schluck gaude Kost ut dei Natur
för dei nödig Leiweskur,
denn Gingko, Bockshornkläwer, Burzeldorn,
dat hülpt den lütten Mann enorm.

In Neradin is wat enthollen,
dat all dei Mayas hett gefollen;
Seratolin gifft Manneskraft,
bekannt as Himalaya-Saft,
un nie is nu Erectonin
mit Arginin ut dei Lepin.
Doch möt 'n ganz väl Geld utgäben,
will man Leiwesglück beläben.
In't Sporschwien is kein Euro mihr,
dat freut den Pillendreiher sihr!